ԵՐԵՎԱՆ, 27 դեկտեմբերի — Sputnik. Սիրիացի Գևորգ Աննայանը Հայաստան է տեղափոխվել 2011 թվականին։ Նա գոհ է ամեն ինչին, սակայն խնդիրներ ունի ռուսաց լեզվի հետ, որը հայրենադարձին անհրաժեշտ է լինում աշխատանքի բերումով։
Այդ մասին Գևորգը պատմել է Sputnik Արմենիայի հետ զրույցում Հայկական Բարեգործական Ընդհանուր Միությունում տոնական երեկոյի ժամանակ, որը հատուկ սիրիահայ երեխաների համար կազմակերպել էր Սփյուռքի նախարարությունը։
«Կինս Հայաստանից է, չորս երեխա ունենք, նրանք բոլորն այստեղ են ծնվել։ Ես աշխատանք գտա, մենք գոհ ենք, փառք աստծո», – պատմեց Գևորգը։
Երեխաները Հայաստանում են մեծանում. հարց է` ընտանիքը Սիրիա վերադառնալ ուզում է, թե ոչ։ Եթե նախկինում Հալեպի հայկական թաղամասում 30-40 հայ ընտանիք էր բնակվում, ապա այսօր շատ քիչ հայ է մնացել այնտեղ, նշեց մեր զրուցակիցը։
Գևորգը սովոր չէ Նոր տարին մի քանի օր շարունակ նշելու ավանդույթին։ Նրա խոսքով` Սիրիայում Նոր տարին միայն մեկ օր են նշում, իսկ Հայաստանում մարդիկ միմյանց հյուր են գնում շուրջ տասը օր։
«Այնտեղ նախապես պայմանավորվում էին, իսկ այստեղ գալիս են առանց նախազգուշացնելու, նույնիսկ հարևանները», – զարմանքն արտահայտեց Sputnik Արմենիայի զրուցակիցը։
Գևորգը պատմեց, որ Հայաստանում առաջին տարիները դժվար անցան։ Այսօր ամեն ինչ կարգին է, սակայն խնդիր կա ռուսաց լեզվի իմացության հետ, որը Գևորգին հարկավոր է աշխատանքի մեջ։ Իսկ նրա երեխաները ռուսերեն արդեն գիտեն։
Միջոցառմանը ներկա էր նաև ՀՀ սփյուռքի նախարար Հրանուշ Հակոբյանը։
«Մենք մշտապես կապ ենք պահում Սիրիայում այժմ բնակվող հայերի հետ։ Այսօր այնտեղ շուրջ 20 հազար հայ կա։ Երկրի համար նման ծանր պայմաններում նրանք կարողացել են պահպանել մշակույթը, կազմակերպել այնտեղ իրենց կյանքը, շարունակել զարգանալ, սովորել», – Sputnik Արմենիային ասաց նախարարը։
Գերատեսչության ղեկավարի խոսքով` մեր հայրենակիցները Հայաստան են եկել այստեղ արմատներ գցելու համար։ Եվ վերադառնալ նրանք, հիմնականում, չեն ցանկանում։
«Դա ամենամեծ նվերն է մեզ համար։ Սիրիահայերը լիովին ինտեգրվել են. երեխաները մանկապարտեզ են հաճախում, դպրոց, մեծահասակները` բուհերում սովորում, աշխատում», – նշեց Հակոբյանը։
Նախարարը նաև ավելացրեց, որ հինգ տարին բավարար էր, որ սիրիացի հայրենակիցները լիովին հարմարվեն Հայաստանում։
AGBU–ն արդեն երրորդ տարին է Ամանորի տոների շրջանակներում շուրջ 600 սիրիահայ երեխաների (3-11 տարեկան) նվերներ է տալիս։
Սիրիայի հայ համայնքը համարվում էր ամենահզորներից մեկը՝ մինչև երկրում հակամարտության սրացումը, և շուրջ 110 հազար մարդ էր ընդգրկում իր կազմում։ Հայերը նշանակալի դեր էին խաղում երկրի սոցիալական, քաղաքական և մշակութային կյանքում։ Մեծամասամբ, հայերն ապրում էին Հալեպում (ավելի քան 60 հազար մարդ), Դամասկոսում (շուրջ 7 հազար մարդ), Լաթաքիայում, Քեսաբում և Էլ-Քամիշլիում։ Սիրիական ճգնաժամից հետո, տարբեր գնահատականների համաձայն, ավելի քան 90 հազար հայ է լքել երկիրը, սակայն պատմական հայրենք եկել են քչերը։
