ԵՐԵՎԱՆ, 19 մայիսի — Sputnik. Հայաստանի նախագահ Սերժ Սարգսյանը մայիսի 19-ին ներկա գտնվեց սիրիահայերի ստեղծած արտադրանքի ցուցահանդեսին:
Տպագրության, հրատարակչության, ոսկերչության, փայտամշակման, զբոսաշրջության, ասեղնագործության, սարքավորումների արտադրության, հաստոցաշինության և այլ ոլորտներում արտադրանք թողարկող սիրիահայերի ջանքերը Սերժ Սարգսյանը ոգևորիչ է համարել և բարձր գնահատել ներկայացված ապրանքների որակական հատկանիշները:
Նախագահը սիրիահայ ձեռներեցների հետ քննարկել է նրանց արտադրանքի իրացման և արտահանման հնարավորություններին վերաբերող հարցեր:
Հայաստանի էկոնոմիայի նախարար Արծվիկ Մինասյանի խոսքով` սիրիահայերի փոքր բիզնեսը սկսում է մեծանալ:
«Պրակտիկան ցույց է տալիս, որ մարդիկ լավատես են, իսկ բիզնեսում դա շատ կարևոր է։ Երբեք չի կարելի ասել` վերջ, ավարտն էր սա։ Մեր հայրենակիցները ցույց տվեցին, որ կարելի է ստեղծել և զարգացնել ինչ-որ մի բան ամենասկզբից», — ասաց Մինասյանը։
Նրա կարծիքով` բոլոր ներկայացված ապրանքներն ու ծառայությունները մտնում են Հայաստանի տնտեսության հեռանկարային և ռազմավարական ուղղությունների մեջ.
«Սկսած ձեռքի աշխատանքից, վերջացրած սարքավորումներով, որոնք մասամբ տեխնոլոգիական նորարարություններ են պարունակում, այդ թվում` ԵՏՄ շուկաներում։ Մենք կաջակցենք նրանց, և մոտ ժամանակներում սիրիահայերի արտադրանքը կտեսնենք նոր շուկաներում»։
Պետության աջակցությունն, ըստ նրա, կդրսևորվի արտահանմանն աջակցությամբ, գովազդային ակցիաների համաֆինանսավորմամբ և ապրանքների ցուցահանդեսների կազմակերպմամբ։
Արծաթյա իրերի և զարդերի վաճառքով զբաղվող Նազարեթ Արոյանը, ով Հայաստան է տեղափոխվել ընտանիքի հետ 7 ամիս առաջ, պատմում է, որ հայերը հայտնի էին ամբողջ Հալեպում իրենց վարպետությամբ։
«Արաբները թեև փորձում էին, սակայն չկարողացան այդպես աշխատել։ Ես այնտեղ 3 խանութ ունեի, դրանցից մեկը պարսկական գորգերի խանութն էր, որը գտնվում էր «Sheraton» հյուրանոցում», — ասաց Արոյանը։
Նա պատրաստվում է վաճառել այն ամենն, ինչ հնարավոր է եղել Հալեպից տեղափոխել, որից հետո հնարավորության դեպքում Հայաստանում արտադրություն բացել։ Վերադառնալ նա մտադիր չէ։ Ասում է, որ այնտեղ հայեր գրեթե չեն մնացել` ընդամենը 7 հազար նախկին 80 հազարից։
Շոկոլադ ներկայացնող սեղանիկի մոտ կանգնած է Սոսե Կարադանայանը։ Նա Հայաստան է եկել Սիրիայից դեռևս 2012 թվականին, երկու տարի առաջ ինքն ու ամուսինը սկսել են զբաղվել կոնֆետների արտադրությամբ։
«Աստիճանաբար զարգանում ենք, հիմնական խնդիրը վաճառքն է։ Սակայն վաճառքն աճում է, մենք սկսել էինք շոկոլադի մեկ տեսականուց, այժմ արդեն երեքն ունենք», — ասում է Կարադանայանը։
Հայաստանում բիզնեսը հնարավոր է զարգացնել, կարծում է նա։ Այժմ Սոսեն ձգտում է սեփական խանութն ունենալ, այլ ոչ թե արտադրանքը վաճառել ցուցահանդեսների ժամանակ։
«Նոր հեռանկարներ սիրիահայերի համար» ցուցահանդեսն ու «Տնտեսական հնարավորությունների շաբաթ» բիզնես համաժողովն իրականացվում են «Սիրիացի փախստականների տնտեսական ինտեգրումը Հայաստանում» ծրագրի շրջանակում։ Այն ուղղված է սիրիահայերի շրջանում ձեռնարկատիրության աջակցմանը։ Միջոցառումը պետք է օգնի նրանց կապեր հաստատել, զարգացնել սեփական հնարավորությունները։ Ծրագրի հեղինակը Գերմանիայի միջազգային համագործակցության ընկերությունն է։ Ծրագիրը կտևի մինչև 2017 թվականի հոկտեմբեր։
