ԵՐԵՎԱՆ, 26 դեկտեմբերի — Sputnik. Բարձր մակարդակի այցերը դրական ազդեցություն են ունենում երկկողմանի հարաբերութունների վրա, նպաստում են դրանց հետագա զարմացմանը, հայտնել է ՀՀ նախագահ Սերժ Սարգսյանն այսօր Վրաստանի վարչապետ Գիորգի Կվիրիկաշվիլիի հետ հանդիպման ընթացքում։
Դեկտեմբերի 25–ին նախագահ Սարգսյանը երկօրյա պաշտոնական այցով մեկնել է Վրաստան։ Այցի շրջանակում Սարգսյանը հանդիպումներ է ունեցել Վրաստանի բարձրագույն ղեկավարության հետ։
«Համոզված եմ, որ բարձր մակարդակով հանդիպումները երկրների միջև հարաբերությունների խորացման առումով միայն դրական արդյունք են տալիս։ Դարերի անցած մեր ճանապարհը պարտավորեցնում է մեզ պատասխանատու լինել մեր ժողովուրդների առջև», – ասել է Սարգսյանը։
Վրաստանի վարչապետը համաձայնել է Հայաստանի նախագահի հետ ու խոստացել է շուտով պատասխան այցով Հայաստան գալ։ Կողմերն ամփոփել են անցած տարին և փաստել, որ երկկողմանի շատ ոլորտներում հարաբերությունների առաջընթաց է գրանցվել։ Զրուցակիցները պատրաստականություն են հայտնել շարունակելու հայ-վրացական կապերի զարգացումը։
Նույն օրը Սարգսյանը հանդիպում է ունեցել Վրաստանի խորհրդարանի նախագահ Իրակլի Կոբախիձեի հետ: Վրացական խորհրդարանի խոսնակն ընդգծել է, որ Վրաստանի խորհրդարանի հայ պատգամավորները ներդրումն են ունենում ոչ միայն խորհրդարանի աշխատանքում, այլ նաև հայ-վրացական հարաբերությունների խորացման գործում։ Հանդիպման ավարտին Սերժ Սարգսյանը գրառում է կատարել Վրաստանի խորհրդարանի հուշամատյանում: «Հավատացած եմ, որ մեր խորհրդարաններին մեծ առաքելություն է վերապահված դարերից սերող մեր ժողովուրդների բարեկամության ամրապնդման գործում. չէ՞ որ Հայաստանում և Վրաստանում անցկացված սահմանադրական փոփոխություններով վերաիմաստավորվեց երկու խորհրդարանների դերն ու նշանակությունը։ Ուստի մաղթում եմ, որ վերջին շրջանում նոր շունչ ստացած մեր միջխորհրդարանական կապերը տարեցտարի առավել սերտանան, ընդլայնվեն ու խորանան՝ դառնալով ևս մեկ շարժիչ Հայաստանի ու Վրաստանի միջպետական հարաբերությունների հետագա զարգացման համար։ Կեցցե՛ն հայ և վրաց եղբայրական ժողովուրդները»,-գրել է Նախագահը։
Վերջին անգամ ՀՀ նախագահը աշխատանքային այցով Վրաստանում եղել էր 2015 թվականի հոկտեմբերին։ Այն ժամանակ երկու երկրների ղեկավարները քննարկել են հայ-վրացական հարաբերությունների օրակարգը, նշմարել են դրա զարգացման հեռանկարները, անդրադարձել են ընթացիկ ծրագրերին` ուղղված համագործակցությանը քաղաքական, տնտեսական, հումանիտար և այլ ոլորտներում։
Նշենք, որ Հայաստանի խորհրդարանական կառավարման անցումը նախատեսող սահմանադրական բարեփոխումների գործընթացը սկսվել է 2013 թվականի սեպտեմբերին։ 2015 թվականին տեղի ունեցած համազգային հանրաքվեի ընթացքում քաղաքացիների մեծ մասը բարեփոխումներին «կողմ» են քվեարկել։ Նախատեսվում է, որ անցումը խորհրդարանական կառավարման ձևին կավարտվի 2018 թվականին։
