ԵՐԵՎԱՆ, 25 Դեկտեմբեր — Sputnik. Թբիլիսիում կայացել են երկու երկրների պաշտոնական պատվիրակությունների մասնակցությամբ ընդլայնված կազմով հայ-վրացական բարձր մակարդակի բանակցությունները: Այս մասին տեղեկացնում է ՀՀ նախագահի պաշտոնական կայքը։
Վրաստանի նախագահ Գիորգի Մարգվելաշվիլին ողջունել է բարեկամ Հայաստանի Նախագահի գլխավորած պատվիրակությանը Թբիլիսիում՝ ընդգծելով, թե ուրախ է, որ Հայաստանի և Վրաստանի միջև դիվանագիտական հարաբերությունների հաստատման 25-ամյակի տարին ավարտվում է Նախագահ Սերժ Սարգսյանի նշանակալի այցով, որը նոր ազդակ կհաղորդի միջպետական հարաբերությունների զարգացմանը և երկու ժողովուրդների բարեկամության ամրապնդմանը:
Իր խոսքում Սերժ Սարգսյանն անդրադարձել է նաև տարածաշրջանային անվտանգության պահպանման և ղարաբաղյան հակամարտության լուծման ուղիներին։
«Հակամարտության լուծումը հնարավոր է միայն խաղաղ ճանապարհով և կողմերի միջև համաձայնեցված ձևաչափերի շրջանակում։ Մենք փորձում ենք բոլոր բանակցություններում այնպիսի ձևակերպումներ, փաստաթղթեր, հայտարարություններ ընդունել, որոնք չեն վնասի Վրաստանի շահերին», – ասել է Սարգսյանը։
Նրա խոսքով` ինչպես վրացական, այնպես էլ հայկական կողմի նման դիրքորոշումը միայն օգուտ կբերի երկկողմ հարաբերություններին և ժողովուրդներին։ Նախագահը նաև նշել է, որ երկկողմ հանդիպման շրջանակում կողմերը քննարկել են մի շարք հարցեր, շոշափել առևտրատնտեսական հարաբերությունները, տրանսպորտային, էներգետիկ ոլորտները, ինչպես նաև տարանցման հնարավորությունները։
«Հայաստանը և Վրաստանը կշարունակեն զարգացնել երկկողմանի հարաբերությունները։ Սա մեզ համար կարևոր տարի է, քանի որ մենք նշում ենք մեր դիվանագիտական հարաբերությունների հաստատման 25–ամյակը։ Իմ այցի նպատակը շփման եզրերը քննարկելու հնարավորությունն է», – ասել է Սարգսյանը։
Ընդլայնված կազմով հանդիպման ժամանակ պատվիրակությունների անդամները ներկայացրել են յուրաքանչյուրն իր ոլորտում համագործակցությունը, իրականացվող համատեղ ծրագրերի ընթացքը, ձեռքբերումներն ու խնդիրները և դրանց լուծման ու փոխգործակցության խորացման ուղղությամբ հանձնարարություններ ստացել նախագահներից:
