ԵՐԵՎԱՆ, 26 դեկտեմբերի — Sputnik. Հայաստանի ֆուտբոլի հավաքականի ավագ և «Մանչեսթեր Յունայթեդի» կիսապաշտպան Հենրիխ Մխիթարյանը ֆեյսբուքյան իր էջի միջոցով շնորհակալություն է հայտնել իր երկրպագուներին և բոլոր այն մարդկանց, ովքեր քվեարկել են իր օգտին։
Հիշեցնենք, որ դեկտեմբեր 25–ի քվեարկության արդյունքում Հենրիխ Մխիթարյանը Հայաստանի 2017թ.–ի լավագույն 10 մարզիկներից մեկն է։ Կիսապաշտպանը խոստացել է եկող տարի իր հայրենակիցներին ավելի շատ ուրախանալու և հպարտանալու առիթներ պարգևել։
«Իմ երկրպագուները իմ մոտիվացիան են: Շնորհակալ եմ բոլոր նրանց, ովքեր քվեարկել են իմ օգտին, և առհասարակ` հայ ժողովրդին ինձ ցուցաբերած ջերմագույն աջակցության համար: Ինձ համար պատիվ է ստանալ ամենաշատ քվեն Հայաստանի 2017 թվականի լավագույն մարզիկների տասնյակում: Կշարունակեմ անել ամեն ինչ` հասնելու նորանոր հաջողությունների` ի ուրախություն իմ ազգի»,–գրել է Մխիթարյանը։
