ԵՐԵՎԱՆ, 25 դեկտեմբերի — Sputnik. Ամերիկյան հեռուստաաստղ Քիմ Քարդաշյանը, հետևելով Սուրբ Ծննդի օրացույցի ավանդույթին, դեկտեմբերի 1-ից սկսած` ամեն օր մեկական լուսանկար էր հրապարակում։
Նա իր ֆոտոշարքում ներկայացել է հոգատար մոր և սիրող կնոջ դերում։ Աստղային ընտանիքի երկրպագուներին հատկապես հուզել են Քիմ Քարդաշյանի և Քանյե Ուեսթի դստեր` Նորթի և որդու` Սեյնթի լուսանկարները։
Դեկտեմբերի 24-ին` կաթոլիկների Սուրբ ծննդի նախօրեին, Քիմն այդ շարքի վերջին լուսանկարն է հրապարակել, որում պատկերված են նրա մեծ ընտանիքի բոլոր անդամները։ Նրա էջի բաժանորդներն իսկույն նկատել են, որ լուսանկարում բացակայում է Քիմի կրտսեր քույրը` Քայլի Ջեները։
Սուրբծննդյան օրացույցի ավանդույթը ծագել է Գերմանիայում, այնուհետև տարածվել եվրոպական բոլոր երկրներում: Օրացույցը բացիկ է կամ ստվարաթղթե տնակ` բացվող լուսամուտներով, որտեղ յուրաքանչյուր պատուհանում կոնֆետ, ցանկություններով գրություն կամ փոքր նվեր է դրված:
Որպես նվեր կարող են ծառայել նաև Սուրբ գրքից մեջբերված հատվածները։ Այդպիսով երեխաներն ու մեծահասակները հետևում են, թե որքան ժամանակ է մնացել Ծննդյան տոնին։
