ԵՐԵՎԱՆ, 25 դեկտեմբերի — Sputnik. Ճարտարապետության և շինարարության ազգային համալսարանի բակում` տոնածառի տակ, հայտնաբերված կասկածելի արկղի վերաբերյալ մանրամասներ է հայտնել ՀՀ ոստիկանության մամուլի քարտուղար Էդգար Ջանոյանը։
«Ըստ նախնական տեղեկությունների` արկղի մեջ հայտնաբերվել է 2 կոնյակի շիշ` անհայտ ծագման հեղուկով, պլաստիլին, փոքրածավալ կուտակիչ, մետաղալարեր և ճայթիչներ` նմանեցված պայթուցիկ սարքի»,- Facebook սոցիալական ցանցի իր էջում գրել է Ջանոյանը։
Իրականում հայտնաբերվածը որևէ վտանգ չի ներկայացնում և առգրավվել է: Դեպքի հանգամանքները պարզվում են: Նշանակվել են փորձաքննություններ: Կատարվում է քննություն:
Նշենք, որ այսօր առավոտյան, ժամը 10.15-ին, ոստիկանություն ահազանգ է ստացվել, որ Ճարտարապետության և շինարարության ազգային համալասարանի բակում` եղևնու տակ, կասկածելի արկղ կա:
Դեպքի վայր է մեկնել ոստիկանության տարբեր ստորաբաժանումների ծառայողներից կազմված խումբը, որն անվտանգ վայր տեղափոխելով` բացել է արկղը: