ԵՐԵՎԱՆ, 25 դեկտեմբերի — Sputnik. Հայաստանի Սննդամթերքի անվտանգության պետական ծառայությունը շուկայից հետ է կանչել ավելի քան 30 հազար կիլոգրամ հավի միս։ Այդ մասին լրագրողներին հայտն ծառայության տնօրեն Իշխան Կարապետյանը։
«Հետք» պարբերականի ահազանգի հիման վրա ծառայությունը ստուգել է հավի մսի 16 մատակարարների (արտադրողների և ներկրողների) և շուկայից հետ կանչել այն արտադրանքը, որում բակտերիաների ցուցանիշները չեն համապատասխանել սահմանված նորմերին (հակաբիոտիկների վերաբերյալ չափաբաժին սահմանված չէ)։
Միևնույն ժամանակ պետք է նշել, որ այդ ապրանքներից մի քանիսը ներկրվել են Հայաստան Եվրասիական երկրներից կամ դրանց տարածքով, ընդ որում`սանիտարական հավաստագրով։ ԵԱՏՄ պետությունները պայմանավորվել են վստահել միմյանց ստուգումների և հսկողության հարցերում։ Ուստի գործընկերների եզրակացությունները չեն ստուգվում (եթե չկան ակնհայտ անհամապատասխանություններ)։
Այնուամենայնիվ, նույնիսկ եթե ապրանքը գալիս է ԵԱՏՄ երկրից, այն պետք է ստուգվի իրացումից առաջ։
Այդ ստուգումները կընդլայնվեն, իսկ արդյունքները կհրապարակվեն, հայտարարեց Կարապետյանը։
Ավելի վաղ տեղեկություն էր տարածվել, որ հայկական խանութներում հայտնվել է ներկրված հավի միս, որը վտանգավոր է մարդու առողջության համար և պիտանի չէ սննդի մեջ օգտագործելու համար։ Ստուգում չանցած միսը հանվել է շրջանառությունից, ընդհանուր առմամբ` 35 տոննա հավի միս։
