ԵՐԵՎԱՆ, 24 դեկտեմբերի — Sputnik. Հայաստանի լեհերը աշխարհի կաթոլիկների հետ միասին դեկտեմբերի 25-ին տոնում են Սուրբ ծնունդը: Տոնական սեղանի շուրջ նրանք հավաքվում են Սուրբ ծնունդի նախօրեին, այսինքն՝ այսօր երեկոյան: Սեղանը պատրաստվում է արևի մայր մտնելուց հետո, երբ երևում է 1-ին աստղը: Պատմում է Հայաստանում լեհական համայնքի ղեկավար Լիանա Հարությունյանը:
Տոնական սեղանին լեհական ազգային ուտելիքներ են՝ ոլոռով կաղամբ, բորշ, քաղցրեղեն: Հին ու ազգային ուտելիքները ոմանց հիշեցնում են նախնիների մասին, իսկ ոմանց, օրինակ՝ Լիանա Հարությունյանին, Լեհաստանում անցկացրած տարիների: Հայերին Լեհաստանում վաղուց արդեն հարազատ են համարում: Այս տարի էլ ամբողջ երկիրը տոնեց հայ համայնքի ձևավորման 650 ամյակը:
Լեհական ավանդույթի համաձայն՝ սուրբծննդյան սեղանին պիտի միս չլինի: Իսկ ձուկն, ահա, պարտադիր է:
Ավանդույթներից մեկի համաձայն՝ սեղանին տասներկու ուտեստ է մատուցվում։ Պարտադիր պետք է համտեսել յուրաքանչյուրից, որպեսզի հաջորդ տարի ինչ-որ ուտեստ «չվիրավորվի» ու կրկին սեղանին չհայտնվի։
Տանտերերն ու հյուրերը սեղանի շուրջ նստում են ըստ տարիքի: Լեհական ավանդույթան համաձայն՝ սա կօգնի, որ ավելի երիտասարդները մեծերից շուտ չլքեն այս աշխարհը:
Սեղանի սփռոցի տակ լեհերը չորացած խոտ են դնում՝ ի հիշատակ այն բանի, որ Հիսուս ծնվել է ախոռում, ոչ շքեղության մեջ: Այդ պատճառով իսկական հավատացյալների համար Սուրբ ծնունդը ոչ թե սեղանի շուրջը հավաքվելու, այլ հոգևոր վերականգման տոն է:
«Պատկերացրեք, Լեհաստանի գյուղերում, նաև՝ քաղաքներում այս սովորույթը դեռ պահպանվում է»,-ասում է Հարությունյանը:
Ընթրիքից հետո լեհերն ընտանիքով երգում են սուրբծննդյան երգեր: Առանց այդ երգերի ոչ մի տոն չի անցնում:
«Իմ երեխաներն այդ երգերն անգիր գիտեն»,-ասում է Լիանա Հարությունյանը:
