ԵՐԵՎԱՆ, 20 դեկտեմբերի — Sputnik. Աշխարհի տարբեր երկրների ընտանիքներ են հարցման ենթարկվել Balsam Hill տոնածառերի ինտերնետային խանութի կողմից` պարզելու, թե ինչպես են նրանք զարդարում իրենց սուրբծննդյան սեղանները, գրում է Business Insider–ը։
Հրատարակության տվյալներով` դդումն ամենագլխավոր սուրբծննդյան մթերքն է, որ զարդարում է հայ ընտանիքների սեղանները։
«Արդեն մի քանի դար շարունակ Սուրբ ծննդին մենք ուտում ենք ղափամա, որը պատրաստում են դդումով։ Սուրբ ծնունդը յուրահատուկ տոն է, ուստի դա տարվա մեջ միակ օրն է, երբ մենք դդում ենք ուտում։ Մենք այն լցոնում ենք բրինձով, չամիչով, մեղրով, և համտեսում ենք հնդկահավի հետ», – ամերիկյան պորտալին պատմել է Հայաստանի բնակիչներից մեկը։
Business Insider–ը ներկայացրել է նաև սուրբծննդյան ընթրիքը Ռուսաստանում` ցույց տալով ռուսական սեղանի համար ավանդական Օլիվյե և Շուբա աղցանները։ Իսկ, օրինակ, Ուկրաինայում սուրբծննդյան սեղանին մատուցում են պելմեններ և սնկով ապուր։
Հրատարակության տվյալներով` սերբերը զարդարում են տոնական սեղանը ձկով, տապակած լոբիով, ինչպես նաև կարտոֆիլի աղցանով։
