ԵՐԵՎԱՆ, 23 դեկտեմբերի — Sputnik. Persil, Ariel և Fairy հայտնի ապրանքանիշների լվացքի փոշիները և լվացող միջոցները, որոնք վաճառվում են հայ-վրացական սահմանի (Վրաստանի կողմից) մոտ գտնվող խանութներում և կրպակներում, կեղծ են։ Այդ մասին Sputnik Արմենիային հաղորդեց Հայաստանի բնակչուհի Անուշ Նավասարդյանը (անունը փոխված է), որը նույնպես հայտնվել է թակարդում և կեղծ ապրանք գնել։
Նրա խոսքով, լվացքի փոշիներում և այլ մաքրող միջոցներում աղ է հայտնաբերվել։
Օրերս Վրաստանի իրավապահ մարմիններն արտադրամասերից առգրավել են շուրջ 2 հազար միավոր կենցաղային քիմիա, ինչպես նաև շշեր, փաթեթներ, պիտակներ և տեխնիկական սարքեր, որոնց օգնությամբ իրականացվել է կեղծ ապրանքի արտադրությունը և բաշխումը։
«Մենք շատ ցածր գնով գնել էինք հայտնի ապրանքանիշներից մեկի 10 կիլոգրամանոց լվացքի փոշին և այլ մաքրող միջոցներ։ Վաճառողը Վրաստանի ադրբեջանցի էր, որը հիանալի հայերեն էր խոսում։ Նա վստահեցրեց, որ արտադրանքը որակյալ է։ Սակայն իրականում պարզվեց, որ լվացքի փոշուն աղ էր խառնած», — ասաց Անուշը։
Նրա խոսքով, հայ-վրացական սահմանի մոտ խանութները շատ են։ Վաճառողները հիմնականում ադրբեջանցիներն ու հայերն են։
Վրաստանի ֆինանսների նախարարության քննչական ծառայության աշխատակիցները քրեական պատասխանատվության են ենթարկել մի քանի քաղաքացիների, որոնք ներգրավված են եղել լվացքի փոշի և մաքրող միջոցներ կեղծելու մեջ։ Պարզվել է, որ Թբիլիսիի և Քվեմո Քարթլիի անօրինական արտադրամասերում նրանք էժան և անորակ լվացքի փոշին ու այլ մաքրող միջոցները լցրել են PERSIL, ARIEL, ABC, Fairy, Domestos և այլ հայտնի ապրանքանիշների փաթեթների մեջ։
Հարուցվել է քրեական գործ «ապրանքանիշի կամ այլ կոմերցիոն նշանակության ապրանքի անօրինական օգտագործում» հոդվածով, ինչը պատժվում է տուգանքով կամ մինչև 3 տարի ազատության սահմանափակումով կամ 3-5 տարի ազատազրկումով։
