ԵՐԵՎԱՆ, 22 դեկտեմբերի — Sputnik, Լաուրա Սարգսյան. Հայկական համարանիշներով մարդատար ավտոմեքենաների վարորդներն ամեն անգամ Վրաստան մեկնելուց առաջ պետք է ապահովագրություն ձևակերպեն։ Սակայն դա չի վերաբերում այն ընկերությունների մեքենաներին, որոնք ուղևորափոխադրումներ են իրականացնում Երևան-Թբիլիսի և հակառակ ուղղությամբ, Sputnik Արմենիայի թղթակցի հետ զրույցում ասաց ընկերություններից մեկի ղեկավարը` Միքայելը (անունը փոխված է)։
Բողոքի ակցիա. աջ ղեկով ավտոմեքենաների վարորդները խոստանում են գործի դնել «կացինը»
Վրաստանի խորհրդարանն ընդունել է նոր օրենք, որը պարտավորեցնում է արտասահմանյան համարանիշներով տրանսպորտային միջոցներն ապահովագրել Վրաստան մուտք գործելիս։ Միաժամանակ ապահովագրության գումարը կախված է մեքենայի տեսակից, շարժիչի հզորությունից, Վրաստանում անցկացրած օրերի քանակից։
«Իմ ընկերությունն ավելի քան տասը տարի ուղևորափոխադրում է իրականացնում ինչպես Հայաստանից Վրաստան, այնպես էլ հակառակը։ Մենք երկկողմ համաձայնագիր ենք կնքել, դրա հիման վրա մեզ արտոնագիր են տրամադրել, որն ազատում է նման պարտավորություններից», — ասաց ընկերության պետը։
Նրա խոսքով` Հայաստանում արտասահմանյան համարանիշներով մարդատար մեքենաների համար ապահովագրության նույնպիսի համակարգ է գործում 2011թ-ից։ Սակայն դատելով գներից` հայկական համարանիշներով մարդատար ավտոմեքենաների վարորդների համար Վրաստան մուտք գործելն ավելի թանկ կլինի։
1.3 և 1.5 լիտր ծավալ ունեցող շարժիչներով մարդատար ավտոմեքենաների վարորդները հայկական սահմանին մեկ անգամ Հայաստան մուտք գործելու համար (մինչև 15 օր) վճարում են 10 լարի (1900 դրամ)։ 3.2 շարժիչով մարդատար մեքենաները` 30 լարի (5700 դրամ), 5.0 շարժիչով մեքենաները` 50-80 լարի (9500-15 500 դրամ)` կախված ավտոմեքենայից։
Վրացական սահմանին մինչև 3.5 տոննա քաշով մարդատար մեքենաները, անկախ շարժիչի ծավալից, պետք է Վրաստանում եղած 15 օրերի ընթացքում վճարեն 30 լարի (5700 դրամ), 30 օրվա համար` 50 լարի (շուրջ 9500 դրամ), պատրաստի ապահովագրությունը կարժենա 295 լարի (շուրջ 56 հազար դրամ)։
«Օտար պետությունում գրանցված, Վրաստանում տեղաշարժվող ավտոտրանսպորտային միջոցի սեփականատիրոջ քաղաքացիական պատասխանատվության պարտադիր ապահովագրության մասին» օրինագիծը պետք է ստորագրի նախագահը։ Նախագծի համաձայն, նոր կանոններն ուժի մեջ կմտնեն մարտի 1-ից։
Ապահովագրություն կարելի է ձեռք բերել հսկիչ անցակետում։ Ապահովագրական փաթեթի արժեքը կախված է տրանսպորտային միջոցի տեսակից և ապահովագրական շրջանի ժամկետից։
Ապահովագրությունը պետք է ծածկի ինչպես ֆիզիկական, այնպես էլ նյութական վնասը, որը հասցվում է տուժածներին ճանապարհատրանսպորտային պատահարների ժամանակ։
Համապատասխան օրենքը, որն ուժի մեջ կմտնի մարտի 1-ից, պետք է ստորագրի երկրի նախագահը:
Աճեմյան. «Բացառված է` համաձայնենք աջ ղեկով մեքենաների շահագործման արգելումը նախատեսող դրույթին»
