ԵՐԵՎԱՆ, 22 դեկտեմբերի — Sputnik, Արմենուհի Մխոյան. 2017 թվականի ընթացքում 49 մեդալ Գյումրի է բերվել միայն Աշխարհի ու Եվրոպայի առաջնություններից: Գյումրու քաղաքապետարանի սպորտի բաժնի պետ Մեխակ Ղազարյանը, թվարկելով բոլոր հաջողությունները, նույնիսկ մի պահ շփոթվում է՝ ոչ մեկին բաց չթողե՞ց:
«Աննախադեպ տարի էր: Նման արդյունքներին կնախանձեն նաև լուրջ մարզական հաջողություններ ունեցող շատ երկրներ: Մեր մարզիկները կարողացան փառք ու պատիվ պարգևել փոքրիկ, բայց մարզական աշխարհում շատ ճանաչված քաղաքին»,- Sputnik Արմենիային ասաց Ղազարյանը՝ քաղաքի մարզական հաջողությունները կապելով մարզիկների «թասիբի» ու գյումրեցիների՝ սպորտի հանդեպ ունեցած հետաքրքրության հետ:
Գյումրին այս տարի ուներ աշխարհի երկու չեմպիոն հունահռոմեական ըմբշամարտից և մարտական սամբոյից: Տարվա ընթացքում իրենց լուրջ արդյունքներով զարմացրին նաև թեթև ատլետները, ծանրամարտիկներն ու բռնցքամարտիկները:
Գյումրեցի մարզիկների հաջողություններին չի խանգարում ո՛չ մարզական կառույցների անմխիթար վիճակը, ո՛չ էլ պայմանները՝ հունահռոմեական ըմբշամարտիկ, աշխարհի եռակի չեմպիոն, Եվրոպայի եռակի չեմպիոն, Օլիմպիական խաղերի բրոնզե մեդալակիր (2012) և 2016 թվականի Ամառային օլիմպիական խաղերի ոսկե մեդալակիր Արթուր Ալեքսանյանը դրա վառ ապացույցն է՝ անմխիթար պայմաններ ունեցող մարզադպրոցում՝ նման արդյունքներ:
Ծանրամարտիկ, սպորտի վաստակավոր վարպետ Տիգրան Մարտիրոսյանն ասում է՝ աշխարհի շատ երկրներ նույնիսկ Գյումրի մտած մեդալների կեսը չեն նվաճում, իսկ Մեխակ Ղազարյանը վստահեցնում՝ Քաթարն այնպիսի մարզական հնարավորություններ ունի, ինչպիսիք շատ երկրներ չունեն, բայց նույնիսկ երազել չի կարող մեր հաջողությունների մի մասի մասին:
2017 թվականին հաջողություններ գրանցած բոլոր մարզիկներին ու մարզիչներին Գյումրու քաղաքապետը դրամական պարգևներ շնորհեց, իսկ մարզիչները ոգևորվեցին ու խոստացան հաջորդ տարի իրենց սաներին այնպես ճանապարհել մրցաշարերի, որ համայնքային բյուջեն «տուժի» պարգևներ հանձնելով:
