ԵՐԵՎԱՆ, 22 դեկտեմբերի — Sputnik. Forbes հայտնի ֆինանսական ամսագիրը Հայաստանին 88-րդ տեղն է հատկացրել բիզնես վարելու համար նպաստավոր երկրների վարկանիշում։ Ցանկն այսօր հրապարակվել է Forbes-ի կայքում։
Վարկանիշում տեղերի հաշվարկը հիմնված է 15 տարբեր ցուցանիշի վրա, որոնց թվում են մասնավոր սեփականության իրավունքների պաշտպանության աստիճանը, նորարարական մոտեցումների կիրառումը տնտեսությունում, ենթակառուցվածքների զարգացման մակարդակը, հարկային համակարգը և այլն։
Ցուցակում ներառվել են 153 երկիր։ Վարկանիշը գլխավորում է Մեծ Բրիտանիան, որին հաջորդում են Նոր Զելանդիան և Նիդեռլանդները։ Բիզնես վարելու համար ամենավատ երկրները ճանաչվել են Չադը, Գամբիան և Հայիթին։
Forbes-ի վարկածով` Վրաստանը վարկանիշում զբաղեցրել է 52-րդ տեղը, Ադրբեջանը` 70-րդ։ Հայաստանի հարևաններից միայն Իրանում է գործարար միջավայրն ավելի մռայլ. այն զբաղեցնում է 100-րդ հորիզոնականը։ Հարևան Թուրքիան 56-րդն է։
