ԵՐԵՎԱՆ, 22 դեկտեմբերի — Sputnik. Երևանյան շուկայում 60-ամյա Լևոն Ասատրյանի սպանության դեպքի առթիվ ՀՀ քննչական կոմիտեի Ավան և Նոր Նորք վարչական շրջանների քննչական բաժնում հարուցվել է քրեական գործ։
Ինչպես հայտնում է քննչական կոմիտեն` հարցաքննվել են մի շարք անձինք, նշանակվել է դիակի դատաբժշկական փորձաքննություն, ոստիկանությանը հանձնարարվել է միջոցներ ձեռնարկել՝ հանցագործություն կատարած անձին ու հանցագործության գործիքը հայտնաբերելու ուղղությամբ։
Այլ մանրամասներ նախաքննական մարմինն առայժմ չի հայտնում։ Մինչդեռ, մամուլում տեղեկություններ են հայտնվել այն մասին, որ տղամարդը Նոր Նորքի «Երևան Սիթի» սուպերմարկետի տարածքում գործող շուկայում պտուղ-բանջարեղեն է վաճառել։ Վիճաբանությունը, որի ժամանակ նրան դանակահարել են, ծագել է ապրանքի թերակշռված լինելու շուրջ։ Այս մասին հայտնում է «Փաստինֆոն»։
Այսօր կեսօրին, «Սուրբ Գրիգոր Լուսավորիչ» բժշկական կենտրոնից ահազանգ էր ստացվել, որ Նոր Նորքի 1-ին զանգվածի շուկայի մոտից ձախ վերանրակային շրջանում կտրած-ծակած վերքերով իրենց մոտ է տեղափոխվել Երևան քաղաքի բնակիչ Լ.Ասատրյանի դին։
