ԵՐԵՎԱՆ, 22 դեկտեմբերի — Sputnik. Ռուսական և բրիտանական արտգործնախարարների միջև վստահության մակարդակն այնքան բարձր է, որ Բորիս Ջոնսոնն իր վերարկուն հանձնել է Սերգեյ Լավրովին` իմանալով, որ դրա հետ ոչինչ չի պատահի։
ՌԻԱ Նովոստին հայտնում է, որ բանակցություններից առաջ զավեշտալի դեպք է պատահել Ռուսաստանի Դաշնության ԱԳՆ առանձնատանը։
«Հենց ես եկա այստեղ, Սերգեյ Լավրովին տվեցի վերակուս և ձեռնոցներս։ Ես գիտեի, որ Լավրովի ներկայությամբ դրանց հետ ոչինչ չի պատահի», — հայտարարել է Ջոնսոնը` պատասխանելով այն հարցին, թե իսկապես իր համար վտանգավոր է Ռուսաստանում գտնվելը։
Դրան ի պատասխան Լավրովը կատակել է, որ Ջոնսոնի վերարկուի գրպաններում ոչինչ չի եղել։
Ջոնսոնը պատասխանել է այդ կատակին. «Այսինքն դու արդեն խուզարկե՞լ ես գրպաններս»։
Դեկտեմբերի 22-ին Բորիս Ջոնսոնն արտաքին գերատեսչության ղեկավարի պաշտոնում առաջին անգամ ժամանել է Մոսկվա։ Սերգեյ Լավրովի հետ բանակցությունների ժամանակ նա իրեն «երդվյալ ռուսամետ» է անվանել և պատմել, որ ռուսական արմատներ ունի։ Միաժամանակ նշվել է, որ երկու երկրի հարաբերություններն այսօր շատ ցածր մակարդակում են։
