ԵՐԵՎԱՆ, 21 դեկտեմբերի — Sputnik. Ֆրանսիական Բրեստի մեծ բեմում Դոն Խոսեի պարտիան կկատարի երիտասարդ տենոր Միհրան Աղաջանյանը։ Ouest-France պարբերականին տված հարցազրույցում այս մասին պատմել է «Մատեուս» հայտնի ֆրանսիական համույթի ղեկավար Ժան-Քրիստոֆ Սպինոզին։
«Դոն Խոսեի պարտիան կատարում է Միհրան Աղաջանյանը, նա հայ է, Մարիինյան թատրոնի աստղ, թատրոնի տնօրենը Վալերի Գերգիևն է։ Միհրանը շատ երիտասարդ է, այդ տարիքում նման ձայն ունենալը պարզապես զարմանալի է», — ասել է Սպինոզին։
Միհրան Աղաջանյանը դաշնակահար է, վոկալիստ, դիրիժոր, դաշնամուրի միջազգային մրցույթների դափնեկիր։ 2007 թվականին արժանացել է «Ռուսաստանի պատանի տաղանդներ» մրցանակին։ 19 տարեկանում առաջին անգամ ելույթ է ունեցել Մարիինյան թատրոնում, իսկ 20-ում հիմնել է 90 հոգանոց Երիտասարդական սիմֆոնիկ նվագախումբը Սանկտ Պետերբուրգում։ Վերջին տարիների ընթացքում Միհրան Աղաջանյանը դիրիժորություն է արել Սանկտ Պետերբուրգի պետական ակադեմիական սիմֆոնիկ նվագախմբում, Ռոստովի երաժշտական թատրոնի նվագախմբում, Էրմիտաժի նվագախմբում։
Սպինոզին պատմել է նաև Բիզեի անմահ օպերայի բեմադրության վրա աշխատող ինտերնացիոնալ թիմի մյուս մասնակիցների մասին։ Այսպես, օրինակ, Միքայելայի դերում հանդես կգա տաղանդավոր երգչուհի, սոպրանո Եկատերինա Բականովան։
«Եկատերինան Լոնդոնի Կովենտ Գարդենում փոխարինել է Աննա Նետրեբկոյին «Տրավիատայում»։ Քննադատները նրան դիֆերամբներ էին երգում», — նշել է Սպինոզին։
Իսկ Կարմենի դերը կկատարի 21-ամյա Դարա Սավինովան, նա ծնվել և մեծացել է Էստոնիայում։
Երաժշտությունը միավորում է մարդկանց և հաղթահարում բոլոր խոչընդոտները։ Թատերախմբի ինտերնացիոնալ կազմը ևս մեկ անգամ ապացուցում է դա, կարծում է Ժան-Քրիստոֆ Սպինոզին և խոստանում, որ նոր բեմադրությունը հանդիսատեսին դեռ շատ անակնկալներ կմատուցի։
