ԵՐԵՎԱՆ, 21 դեկտեմբերի — Sputnik. Հայաստանում աշխատողների 0.43%-ն օտարերկրացիներ են։ Պաշտոնական տվյալների համաձայն` այսօր մեր երկրում 4586 օտարերկրացի է աշխատում։ Այս տվյալներն այսօր կառավարության նիստում հրապարակեց ՀՀ աշխատանքի և սոցիալական հարցերի նախարար Արտեմ Ասատրյանը։
Նա կառավարություն էր եկել օտարերկրացիների աշխատանքի թույլտվության տրամադրման գործընթացի կասեցման ժամկետը երկարաձգելու առաջարկով։
Վարչապետ Կարեն Կարապետյանը հետաքրքրվեց, թե ինչու է ամեն տարի գործընթացը երկարաձգելու որոշում կայացվում։ Նախարարը պատասխանեց, որ կասեցնելու առավելագույն ժամկետը 1 տարի է։
«Դա պայմանավորված է նրանով, որ ընթացակարգերը, որոնցով տրամադրվում էին թույլտվությունները, ենթադրում էին բավականին մեծ վարչարարություն: Հաշվի առնելով, որ այդ թիվը մեծ տեսակարար կշիռ չի կազմում, առաջարկեցինք կասեցնել գործընթացը մինչև համապարփակ լուծումներ բերելը», — ասաց Ասատրյանը:
Նա նաև կարևորեց այն հանգամանքը, որ Հայաստանում աշխատող օտարերկրացիների մեծ մասը` 63%-ը, բարձրագույն և հետբուհական կրթական մակարդակ ունեն:
Որոշումն ընդունվեց, օտարերկրացիներին թույլ տրվեց ևս մեկ տարի անարգել աշխատել Հայաստանում։ Վարչապետն էլ առաջարկեց մինչև հաջորդ տարի քննարկել և գործող կարգը փոխելու ուղիներ գտնել:
