ԵՐԵՎԱՆ, 21 դեկտեմբերի — Sputnik. Հայաստանը Fodor's հեղինակավոր հանդեսի՝ 2018 թ.-ին այցելելու համար ամենահետաքրքիր երկրների ցանկում յոթերորդն է։
«Կովկասյան այդ փոքրիկ երկիրը շատ հարուստ պատմություն և մշակույթ ունի, ինչպես նաև հայտնի է տեղացիների հյուրասեր լինելով»,- ասվում է հաղորդագրության մեջ։DANIELYAN
Հեղինակը նշում է, որ ժայռոտ լեռները և բերրի հովիտները, որտեղ շատ են հնագույն վանքերն ու ավանդական գյուղերը, յուրաքանչյուր էկոտուրիստի երազանքն են, իսկ արշավների նոր արահետներն ու տարբեր ծրագրային հավելումներն ավելի դյուրին են դարձնում երկրի տեսարժան վայրերն ուսումնասիրելը:
«Չնայած մոտ 3000-ամյա պատմությանը՝ Երևանն իր սրճարաններով, գինետուն-բարերով ու ռեստորաններով յուրահատուկ երիտասարդական շունչ ունի»:
Fodor's-ի փորձագետները հավելում են, որ Հայաստան այցելելու լավագույն ժամանակահատվածը գարունն ու աշունն են, երբ ամբողջ երկրում բազմաթիվ բացօթյա փառատոներ և այլ միջոցառումներ են անցկացվում:
Բացի Հայաստանից, Go List-ում ներառված են ևս 51 պետություն: «Ծիրանի երկրի» հետ նույն ցանկում են նաև Բոլիվիան, Իռլանդիան, Բելիզը, Սինգապուրը, Մալթան:
Fodor's-ը ճամփորդության և զբոսաշրջության վերաբերյալ աշխարհի խոշորագույն հանդեսն է, որ հրատարակվում է անգլերենով: Այն առաջինն է սկսել պրոֆեսիոնալ ուղեցույցներ հրատարակել զբոսաշրջիկների համար:
