ԵՐԵՎԱՆ, 2 դեկտեմբերի — Sputnik. «Ռոսիա 24» հեռուստաընկերությունը հերթական ռեպորտաժն է պատրաստել այն մասին, թե ինչպես կարելի է հանգստյան օրերն անցկացնել Հայաստանում, և ինչն է մտնում «must see» ցուցակի մեջ աշխարհի հնագույն երկրներից մեկում։
Հայաստանի հետ ծանոթությունը պետք է սկսել Երևանից, կարծում է հաղորդավար Անտոն Բորիսովը։
«Սա ժամանակակից քաղաք է, որտեղ հետիոտներն իրենց լավ են զգում, մեծ տեղ է հատկացված բուտիկների ցուցափեղկերին և Ֆերնանդո Բոտերի քանդակներին», — պատմել է հաղորդավարը։
Երևանում կարելի է կանգ առնել կենտրոնում, որտեղ ցանկացած կարգի բազմաթիվ հյուրանոցներ կան։ Հայաստանի մայրաքաղաքում զբոսանքն արժի սկսել Հանրապետության հրապարակի երգող շատրվաններից։
Հեռուստաալիքի հատուկ թղթակից Անտոն Բորիսովը որոշել է քյուֆթա պատրաստել, զիփլայնով թռիչք կատարել և տեսնել հնագույն քրիստոնեական մասունքը։ Նա մեծ ուշադրություն է հատկացրել գաստրոնոմիական, գինու և լեռնադահուկային զբոսաշրջության զարգացմանը՝ ընդգծելով, որ Հայաստանը կարող է զարմացնել նույնիսկ ամենափորձառու զբոսաշրջիկներին։
