ԵՐԵՎԱՆ, 21 դեկտեմբերի — Sputnik. Apple ընկերությունը խոստովանել է, որ դիտմամբ է նվազեցնում iPhone-ի որոշ մոդելների աշխատանքի արագությունը, հայտնում է ՌԻԱ Նովոստին` հղում անելով Business Insider-ին։
Apple-ի արտադրության սիրահարներից շատերը նշում են, որ երբ ընկերությունը նոր արտադրանք է թողարկում, բոլոր հին մոդելների աշխատանքը սկսում է «դանդաղեցնել»։ Նույնիսկ Apple-ի վառ երկրպագուներին զայրացնում է մարքեթինգային նման հանդուգն հնարքը։
Սակայն ընկերության մամուլի ծառայությունում նշել են, որ նման քայլի են դիմում, որպեսզի ապահովեն սմարթֆոններում տեղադրված մարտկոցների ավելի լավ աշխատանքը։ Ընդգծում են, որ սահմանափակումը թույլ է տալիս բարձրացնել մարտկոցի աշխատանքի տևողությունը և խուսափել սարքի հանկարծակի անջատման հետ կապված խնդիրներից:
Ընդ որում, Apple-ի ներկայացուցիչների կարծիքով, օգտատերերը հիմնականում չեն նկատում պրոցեսորների հաճախականության իջեցումը։
«Անցյալ տարի մենք այդ ֆունկցիան ավելացրեցինք iPhone 6, iPhone 6s և iPhone SE-ում անկանխատեսելի անջատումները կանխելու համար։ Մոտ ապագայում այն կհայտնվի նաև iPhone 7-ի iOS 11.2. թարմացրած տարբերակում», —ընկերության հայտարարությունը մեջբերում է պորտալը։
Ավելի վաղ Sputnik Արմենիան գրել էր, որ iPhone ունենալու երազանքը հայաստանցիներին ստիպում է վարկերի գիրկն ընկնել ու, հայաստանյան աշխատավարձները հաշվի առնելով, խելահեղ գումարներ տալ Apple-ի արտադրանքն ունենալու համար։ Օրինակ` նախորդ մոդելը (iPhone 7) վաճառքի մեկնարկին մեր երկրում 800 դոլար արժեր, այն դեպքում, որ Apple-ի պաշտոնական կայքում սարքը 200 դոլարով էժան էր։