ԵՐԵՎԱՆ, 22 մարտի — Sputnik. Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեքչյանը նամակով դիմել է Արամ արքեպիսկոպոս Աթեշյանին` խնդրելով կատարել Մայր Աթոռ Սուրբ Էջմիածնում Ամենայն Հայոց կաթողիկոս Գարեգին Բ-ի հրավիրած ժողովի ընթացքում կայացված որոշումներն ու հարգել համայնքային ընտրության արդյունքները:
Գարեգին արքեպիսկոպոս Բեքչյանը պահանջում է Արամ արքեպիսկոպոս Աթեշյանից դադարեցնել «պատրիարքի փոխանորդ» արտահայտության օգտագործումը։ Նա տեղեկացրել է, որ եթե բացակայի Թուրքիայից, այդ ընթացքում պատրիարքի տեղապահի լիազորությունները կկատարի Եկեղեցական խորհրդի նախագահ Սահակ եպիսկոպոս Մաշալյանը: Բեքչյանի նամակը հրապարակել է «Ակոսը»։
Բեքչյանը հիշեցրել է Աթեշյանին, որ տեղապահի ընտրություններն անցկացվել են Հայ առաքելական եկեղեցու կանոնակարգի համաձայն և առանց օրենքի խախտումների, հետևաբար պետք է հարգվեն բոլորի կողմից:
Նշենք, որ Պոլսո Հայոց պատրիարքի տեղապահի ընտրությունը տեղի է ունեցել մարտի 15-ին: Ընտրությունից հետո, որում հաղթել էր Գարեգին արքեպիսկոպոս Բեքչյանը, Ստամբուլի նահանգապետարանը միջամտել էր ընտրություններին` գրություն ուղարկելով այն մասին, որ պատրիարքական ընտրությունների գործընթացի մեկնարկն իրավաբանորեն անհնար է համարում:
