ԵՐԵՎԱՆ, 19 դեկտեմբերի — Sputnik. Հայ-ռուսական հարաբերությունների մասին սխալ է դատել վերջին շաբաթների ընթացքում հնչած անզգույշ ու կտրուկ հայտարարություններով։ Այս մասի ն լրագրողներին ասաց ՌԴ Պետդումայի պատգամավոր, ՌԴ ԱՊՀ երկրների, Եվրասիական ինտեգրացման և համերկրացիների հետ կապերի գործերով հանձնաժողովի նախագահի առաջին տեղակալ, ԱՊՀ երկրների ինստիտուտի ղեկավար, ՌԴ Անվտանգության խորհրդին կից գիտխորհրդի անդամ Կոնստանտին Զատուլինը։
Նա ցավով նշեց, որ Հայաստանի և Եվրամիության համաձայնագրից հետո ռուսաստանցի որոշ փորձագետներ ու մեկնաբաններ շատ բուռն արձագանքեցին։ Ըստ Զատուլինի` նրանց մեկնաբանությունները զգացմունքային էին, երբեմն էլ` գռեհիկ։
«Ռուսաստանում մեկնաբանների մի խավ կա, որոնք պատրաստ են մեկնաբանել ամեն ինչ, ընդ որում` մեծ ինքնավստահությամբ։ Բայց հայկական ԶԼՄ-ներն էլ էին փորձում այդ մեկնաբանությունները վերագրել Ռուսաստանին։ Տարատեսակ ենթադրություններ արվեցին, թե իբր այդ ամենը իշխանությունն է ասում։ Վիրավորական արտահայտություններ հնչեցին Ռուսաստանի հասցեին։ Բայց կարծում եմ` նման հարցերին պետք է հանգստությամբ վերաբերվել։ Ճիշտ այնպես, ինչպես մենք հանգստությամբ վերաբերվեցինք ԵԱՏՄ-ից դուրս գալու քննարկմանը, որն անցկացվեց Հայաստանի Ազգային ժողովում»,- ասաց Զատուլինը։
Այժմ պետք է նշել, որ տհաճ էջն արդեն փակված է, իսկ փոխադարձ մեղադրանքներ էլ այլևս չեն հնչում։
Հիշեցնենք, որ Հայաստան-ԵՄ համապարփակ և ընդլայնված գործընկերության համաձայնագիրը ստորագրվել է նոյեմբերի 24-ին Բրյուսելում։
