ԵՐԵՎԱՆ, 17 դեկտեմբերի — Sputnik. Հայաստանն ու Իսրայելը պետք է լիարժեք դիվանագիտական հարաբերություններ հաստատեն, Sputnik Արմենիային ասաց իսրայելցի հրապարակախոս և հասարակական գործիչ, քաղաքագետ Ավիգդոր Էսքինը:
«Կարծում եմ, որ եկել է ժամանակը, որպեսզի Հայաստանն ու Իսրայելը լիարժեք դիվանագիտական հարաբերություններ հաստատեն», — ասաց Էսքինը:
Նրա խոսքով` այդ քայլին դիմելու համար որևէ խանգարող հանգամանք չկա: Ադրբեջանին զենք վաճառելը նույնպես խոչընդոտ չէ, քանի որ նույնն անում է նաև Ռուսաստանը` մնալով Հայաստանի գլխավոր դաշնակից:
Նույն տրամաբանությամբ Իսրայելը չպետք է Հայաստանից հեռու մնա Թեհրանի հետ Երևանի ունեցած սերտ կապերի պատճառով:
«Ձեզ համար դա շատ կարևոր է, Իսրայելը դա հասկանում է, դա պետք է ընդունել որպես փաստ: Իրանի հետ այդ բարեկամությունն Իսրայելի դեմ չէ, ճիշտ այնպես ինչպես Ադրբեջանի հետ Իսրայելը բարեկամություն չի անում Հայաստանի դեմ: Մենք միմյանց դեմ չենք, սակայն մենք մեր մասնավոր շահերն ունենք», — ասաց Էսքինը:
ՀՀ արտգործնախարար Էդվարդ Նալբանդյանը նոյեմբերի 6-ին Իսրայելի արտգործնախարար և վարչապետ Բենիամին Նեթանյահուի հրավերով երկօրյա այցով մեկնել էր Իսրայել:
Մի շարք փորձագետների կարծիքով` Հայաստանն ու Իսրայելը շահագրգռված են հարաբերություններ հաստատել, անկախ նրանից, որ Հայաստանը դժգոհ է Ադրբեջանին իսրայելական զենք վաճառելու փաստից:
