ԵՐԵՎԱՆ, 16 դեկտեմբերի — Sputnik. Երևանի տրանսպորտը կղեկավարեն ոչ թե գծատերերը, այլ մրցույթով ընտրված 1-2 օպերատոր, «Գազելներն» էլ կդառնան ոչ այնքան հաճելի հիշողություններ։ Բայց այս ամենը կլինի նվազագույնը 1 տարի հետո, Իսկ մինչ այդ Երևանի քաղաքապետարանում մշակում են մայրաքաղաքի տրանսպորտի նոր ցանցը։ Կատարված ու կատարվող աշխատանքների, ինչպես նաև ակնկալվող արդյունքների մասին Sputnik Արմենիային որոշ մանրամասներ է պատմել Երևանի փոխքաղաքապետ Վահե Նիկոյանը։
Այս տարեսկզբից Երևանի նոր տրանսպորտային ցանցի մշակմամբ զբաղվող «Դաբլյու Վայ Ջի Ինթերնեյշնլ լիմիթիդ» խորհրդատվական ընկերությունը, Նիկոյանի խոսքով, արդեն ավարտել է աշխատանքն ու այն ներկայացրել քաղաքապետարան։
Քաղաքապետարանի մասնագետներն այժմ ուսումնասիրում են նախագիծը, որից հետո կներկայացնեն իրենց դիտողություններն ու առաջարկները։ Այնուհետև այն կներկայացվի արդեն մասնագիտացված խմբի քննարկմանը և միայն դրանից հետո` հանրությանը։
Բայց մինչ երևանցիները հնարավորություն կստանան փորձարկելու նոր տրանսպորտային ցանցը, նրանք կկարողանան դրա արդյունավետությունը ստուգել հատուկ հեռախոսային ծրագրի միջոցով։
«Մենք բանակցել ենք Yandex ընկերության հետ`մեզ համար ծրագրային ապահովության մեխանիզմ ստեղծելու հարցով, որպեսզի յուրաքանչյուր քաղաքացի կարողանա այդ ցանցի արդյունավետությունը ստուգել իր իսկ տեղաշարժի օրինակով` որտեղից ուր գնալու համար ինչքան պետք է քայլել մինչև կանգառ, կանգառից ինչ նստել, որտեղից ինչ տրանսպորտ փոխել և որքան կտևի իրենց երթևեկությունը»,- ասաց Նիկոյանը։
Նոր երթևեկությունը կազմակերպվելու է առանց միկրոավտոբուսների ու առանց գծատերերի։ Երթուղիները կառավարվելու են մեկ-երկու օպերատորի կողմից, իսկ վարորդին վճարելու փոխարեն ուղևորները կունենան էլեկտրոնային տոմսեր, ինչը, Նիկոյանի խոսքով, թույլ կտա երթևեկության որոշակի ժամանակահատվածում տրանսպորտը փոխելիս վճարել միայն մեկ անգամ։
«Հաշվի առնելով այդ ոլորտում դրամական հոսքերի թափանցիկության բացակայության վերաբերյալ հանրության պահանջը, մենք խնդիր ենք դրել, որ կանխիկը վերանա։ Կանխիկ վճարումներն ամբողջությամբ վերացնել հնարավոր չէ, բայց վարորդ-ուղևոր շփումը վերացնելու համար կանգառներում կտեղադրվեն տերմինալներ, եթե հնարավոր լինի` նաև ավտոբուսներում»,- ասաց Նիկոյանը։
Բարեփոխումները նախատեսվում է ավարտել մինչև 2018թ-ի վերջը։ Նիկոյանը հույս հայտնեց, որ հաջորդ Ամանորը կդիմավորենք նոր տրանսպորտով։
