ԵՐԵՎԱՆ, 16 դեկտեմբերի — Sputnik. Մշակել է նախագիծ, ըստ որի` 2018 թվականի ապրիլի 1-ից կարգելվի աջակողմյան ղեկային տեղաբաշխմամբ տրանսպորտային միջոցների ներմուծումը Հայաստան:
Փաստաթղթի հեղինակը ՀՀ տրանսպորտի, կապի և տեղեկատվական տեխնոլոգիաների նախարարությունն է։ Տեքստը տեղակայված է իրավական ակտերի նախագծերի հրապարակման միասնական հարթակում։
«ՀՀ-ում աջ ղեկով մեքենաների շահագործումը երթևեկության համար վտանգ է ներկայացնում, քանի որ աջակողմյան երթևեկության դեպքում տրանսպորտային միջոցի վարորդն ունի սահմանափակ տեսանելիություն: Մասնավորապես, կանգառի կամ կայանման վայրից տրանսպորտային միջոցի շարժումը սկսելու, երթևեկության գոտի վերադասավորվելու, երթևեկության ուղղությունը փոփոխելու, վազանց կատարելու և այլ դեպքերում», — նշված է հրապարակման մեջ։
Տրանսպորտի նախարարությունն առաջարկում է ժամանակավոր արգելել աջ ղեկով մեքենաների ներկրումը, իսկ հետագայում նաև շահագործումը։
Նախարարությունում առաջարկում են արդեն ներկրված մեքենաների շահագործումը թույլ տալ մինչև 2018 թվականի ապրիլի 1-ը՝ սահմանափակելով դրանց վերագրանցումը։ Նախագծի համաձայն՝ նախարարների կաբինետի որոշումը պետք է ուժի մեջ մտնի 2018 թվականի ապրիլի 15-ից։
Առաջարկվում է նաև որոշման մասին տեղեկացնել ԵԱՏՄ-ին ու փոփոխություններ մտցնել «Անվավոր տրանսպորտային միջոցների անվտանգության մասին տեխնիկական կանոնակարգը հաստատելու մասին» օրենքում և Հայաստանը ներառել այն երկրների ցանկում, որտեղ արգելվում է աջակողմյան ղեկային տեղաբաշխմամբ տրանսպորտային միջոցները։
Աջ ղեկով մեքենաները Հայաստանում մեծ տարածում ունեն, քանի որ ձախ ղեկով մեքենաներից անհամեմատ էժան են։
Թե քանի այդպիսի մեքենա կա երկրում ՝ հայտնի չէ, քանի որ ղեկի տեղաբաշխումը չի նշվում ո՛չ մաքսային կետում, ո՛չ ճանապարհային ոստիկանության գրանցումն անելիս։ Վարորդները դժգոհ են, քանի որ երկրում չկան գործարաններ, որտեղ հնարավոր է փոխել ղեկի տեղը։ Բացի այդ, կան մոդելներ, որոնց ղեկի տեղն ընդհանրապես հնարավոր չէ փոխել։
