ԵՐԵՎԱՆ, 15 դեկտեմբերի — Sputnik. Դիլիջանի հանրային տրանսպորտում տաքանալու համար գազ են վառում։ Այս մասին հայտարարել է ֆեյսբուքյան օգտատեր Միլենա Խեչիկյանը։ Նա նաև լուսանկար է հրապարակել, որտեղ երևում է, որ ավտոբուսում, վարորդը բաց օջախով գազ է այրում։
«8։30-ի երթուղային ավտոբուսը։ Գազը լցված ավտոբուսի մեջ։ Մեջն էլ լրիվ դպրոցական երեխաներ»,– գրում է օգտատերը։
Նա նաև պատմում է, որ իր մտահոգությանն ի պատասխան վարորդն ասել է. «Բան չի լինի, արխային»։
«Կանգառներում էլ չէր անջատում։ Երեխաները շորերը, պայուսակները վառելով իջնում էին»,– գրում է Խեչիկյանը։
Հետաքրքրական է, որ Միլենա Խեչիկյանի գրառմանն արձագանքել է մեկ այլ օգտատեր, ով նմանատիպ մեկ այլ լուսանկար է հրապարակել ու հայտնել, որ լուսանկարն արվել է մեկ տարի առաջ։ Այսինքն` Դիլիջանում ավտոբուսում գազ այրելը նորություն չէ։
Սոցիալական կայքերում լայն արձագանք առաջացրած ու տարածված լուսանկարին այսօր արձագանքել է նաև Դիլիջանի քաղաքապետարանը։
««ԴԻԼՏրանս» ՍՊԸ տնօրեն էմին Մարգարյանը խստորեն զգուշացվել է`տրանսպորտային սպասարկման տեխնիկական անվտանգությունը չապահովելու համար: Պահանջվել է, որ ընկերության կողմից լուրջ վերահսկողություն սահմանվի բացառելու վարորդների կողմից սպասարկման ընթացքում տեխնիկայի օգտագործման կամայական գործողությունները: Տնօրենի հավաստմամբ կարգապահական խախտում թույլ տված վարորդն ազատված է աշխատանքից»,– ասված է Դիլիջանի քաղաքապետարանի պաշտոնական կայքում հրապարակված հաղորդագրության մեջ։
Նշենք, որ ««ԴԻԼՏրանս» ՍՊԸ–ն Դիլիջանում սպասարկում է 3 ներքաղաքային երթուղի` թիվ 1, 2 և 3։
Ընկերությունը հաղթող է ճանաչվել 2015թ–ին հայտարարված մրցույթում և իրավունք է ստացել նշված երթուղիները շահագործել մինչև 2018թ.–ի դեկտեմբերի 31-ը։
