ԵՐԵՎԱՆ, 15 դեկտեմբերի — Sputnik. Երևանի քաղաքապետարանը տրանսպորտի սակագնի թանկացման հարցը չի քննարկել։ Այս մասին Sputnik Արմենիայի հետ զրույցում ասաց փոխքաղաքապետ Վահե Նիկոյանը։
Դիզելային վառելիքի հնարավոր թանկացման մասին քաղաքապետարանում տեղեկացել են մամուլից։ «Կարծում եմ` դրանք ուղղակի կանխատեսումներ են, այս պահին փաստեր չկան` արդյոք իրոք թանկանալու է 100 դրամով, թե ոչ»,- ասում է Նիկոյանը։
Կանխատեսումների հիման վրա Երևանի քաղաքապետարանը նաև կանխատեսումներ չի արել, թե որքանով կարող է սպասվող թանկացումն ազդել տրանսպորտային ծախսերի ավելացման վրա և որքանով այն կարտահայտվի սակագնի մեջ։
«Կարծում եմ` մինչև հիմա էլ շատ ազդեցություններ տրանսպորտային ծախսերի վրա եղել են, բայց մենք բոլորս հասկանում ենք, որ տրանսպորտը դրանցից կախված չի թանկացել»,- ասաց Նիկոյանը։
Երևանի քաղաքապետարանն այս պահին ավելի շատ զբաղված է նոր տրանսպորտային ցանցի ներդրման ծրագրերով։
Փոխքաղաքապետը հայտնեց, որ երևանցիները խոստացված նոր տրանսպորտային ծառայությունները կստանան 2018թ-ի վերջին։
Ազգային վիճակագրական ծառության տվյալով, 2017թ. նոյեմբերին հոկտեմբերի համեմատ բենզինի և դիզելային վառելիքի գներն աճել են 0.5%-ով: Որոշ փորձագետների կանխատեսումներով, կտրուկ թանկացում (1լիտրը 100 դրամով) կլինի նաև 2018թ-ի հունվարի 1-ից։
