ԵՐԵՎԱՆ, 14 դեկտեմբերի — Sputnik. Հայոց ցեղասպանության ճանաչման մասին օրինագիծը կմտնի Իսրայելի Քնեսեթ, հայտարարել է «Եշ Ատիդ» ընդդիմադիր իսրայելական կուսակցության առաջնորդ Յաիր Լապիդը, հաղորդում է Times of Israel-ը։
Նրա խոսքով` Թուրքիայի հետ Իսրայելի հաշտեցման մասին համաձայնությունը 2016թ-ին «դիվանագիտական սխալ» էր։
Անկարայի և Երուսաղեմի միջև «խոսքային» պատերազմի ֆոնին Լապիդը հայտարարել է, որ նրա կուսակցությունը Քնեսեթ կմտցնի Հայոց ցեղասպանության ճանաչման մասին օրինագիծը։ Քայլ, որից Իսրայելն ավանդաբար զերծ է մնում, որպեսզի չբարկացնի Թուրքիային։
«Եշ Ատիդի» առաջնորդը նաև կոչ է արել «թաղել վատ գաղափարը»` Թուրքիայում գազատար կառուցելը։
Բացի այդ, նրա կարծիքով` Իսրայելը պետք է «ամրապնդի անկախ քրդական պետություն ստեղծելու աջակցությունը»։
«Նա, ով հերքում է Հայոց ցեղասպանության ընթացքում հարյուր հազարավոր երեխաների սպանությունը, մեզ խրատներ չի կարդա։ Նա, ով համագործակցել է Իրանի հետ և Սիրիայում Հեզբոլլահի հետ, որը խլել է կես միլիոն կյանք, մեզ դասախոսություն չի կարդա», — ասել է Լապիդը։
Ավելի վաղ Լապիդը նման հայտարարություն էր արել Twitter-ում` մեկնաբանելով Իսրայելի «ահաբեկչության» մասին Թուրքիայի նախագահի ասածը։ Նա գրել է, որ քրդական գյուղերը ռմբակոծող, լրագրողներին բանտ նետող, Իրանին միջազգային պատժամիջոցներից խուսափելու հարցում օգնող, Գազայում և այլ վայրերում անմեղ մարդկանց սպանության գործում ահաբեկիչներին աջակցող մարդը թող խրատներ տա ուրիշներին։
