ԵՐԵՎԱՆ, դեկտեմբերի 4 — Sputnik. Երևանը սփյուռքի ազդեցության ներքո հրաժարվել է Անկարայի հետ համագործակցությունից ու դուրս է մնացել էներգետիկ ու տրանսպորտային նախագծերից, հայտարարել է Թուրքիայի նախագահ Ռեջեփ Թայիփ Էրդողանը։ Այս մասին հայտնում են ադրբեջանական ԶԼՄ-ները` հղում անելով Hurriet պարբերականին։
«Հայաստանն իր սփյուռքի ազդեցության տակ փակել է մեզ հետ համագործակցելու բոլոր ալիքները և այդ պատճառով մնացել է առանց որևէ էներգետիկան, տրանսպորտային ու առևտրական նախագծերի», — ասել է Էրդողանը «Արդարություն ու զարգացում» կուսակցության կոնգրեսում։
Ընդ որում, նրա խոսքով, Վրաստանը Թուրքիայի ու Արևմուտքի միջև կամուրջ է դարձել` մի կողմից, ու Կովկասի և Միջին Ասիայի միջև` մյուս կողմից` այդպիսով երաշխավորելով սեփական ապագան։
«Այս երկու օրինակը շատ հատկանշական են։ Նա, ով մեզ հետ ընկերություն է անում, ձեռքբերումներ է ունենում, ով քեն է պահում, կորցնում է», — հայտարարել է Էրդողանը։
2009 թվականի հոկտեմբերի 10-ին Թուրքիան ու Հայաստանը դիվանագիտական հարաբերությունների հաստատման ու սահմանի բացման մասին արձանագրություն էին ստորագրել։ Այդ իրադարձությունը գնահատվում էր որպես լարված հարաբերությունների կարգավորման ուղղությամբ կատարած քայլ։ Սակայն արձանագրություններն այդպես էլ չվավերացվեցին։
