ԵՐԵՎԱՆ, 14 դեկտեմբերի — Sputnik. Հայ-կիպրական և հայ-հունական հարաբերությունները վերջին ժամանակաշրջանում աշխուժացել են, ինչի վկայությունն է երկկողմ այցերի հաճախականությունը։ Լրագրողների հետ հանդիպմանն այս մասին ասաց ՀՀ սփյուռքի նախարար Հրանուշ Հակոբյանը։
Հակոբյանն ու Հունաստանի փոխարտգործնախարար Տերես-Նիկոլայ Գոիկը դեկտեմբերի 15-ին երկկողմ համագործակցության մասին հուշագիր կստորագրեն Երևանում։ Նման հուշագիր է ստորագրվել Հայաստանի և Կիպրոսի միջև 2017 թվականի հունիսին։ Այդ փաստաթղթերը դրվել են երկրների փոխգործակցության հիմքում` եռակողմ ձևաչափով։
«Հայաստանի, Հունաստանի և Կիպրոսի միջև համագործակցության եռակողմ ձևաչափի ակտիվացման համար հիմք հանդիսացավ կիպրական և հայկական սփյուռքի գերատեսչությունների միջև առաջին հուշագրի ստորագրումը։ Վաղը նույնպիսի հուշագիր է ստորագրվելու մեր և Հունաստանի միջև», — ասաց Հակոբյանը։
Նա հիշեցրեց նաև երկրների միջև վաղեմի պատմական կապերը, նշեց, որ երկրները մի շարք ընդհանրություններ ունեն, այդ թվում` առաջին ու առայժմ միակը աշխարհում` սփյուռքի գերատեսչությունների մակարդակով համագործակցության եռակողմ ձևաչափը։
Կողմերն արդեն կազմել են 2018 թվականի համագործակցության ծրագիրը, կազմակերպվելու են երիտասարդական համաժողովներ, ցուցահանդեսներ և այլ միջոցառումներ։ Այն, որ երեք երկրի ժողովուրդները հիշելու բան ունեն և հիմքեր ունեն, որի շուրջ կարող են կառուցել և զարգացնել համագործակցությունը, ընդգծեց նաև Կիպրոսի Հանրապետության նախագահի արտերկրյա և հումանիտար հարցերով հանձնակատար Ֆոտիու Ֆոտիսը։
«Մեր համագործակցությունը նոր էջ է բացում։ Մենք պետք է նպաստենք մեր գերատեսչությունների արդյունավետ աշխատանքին», — հայ լրագրողների հետ զրույցում ասաց նա։
Ֆոտիսի խոսքով` Կիպրոսը, Հունաստանն ու Հայաստանը համագործակցում են մի շարք ոլորտներում, հաճախակի այցեր են կազմակերպում պետության ղեկավարների ու վարչապետների մակարդակով, ինչն ապացուցում է, թե որքան լավ հարաբերություններ են ձևավորվել երկրների միջև։ Նրա հետ համաձայն է նաև Հունաստանի փոխարտգործնախարար Տերես-Նիկոլայ Կուիկը։ Նա համոզված է, որ ցանկացած հարցում սկիզբը` գործի կեսն է։
«2018 թվականին ցուցահանդես կկազմակերպվի Սալոնիկում, որտեղ գտնվում է հայկական խոշոր համայնքներից մեկը։ Մեր գերատեսչությունների համագործակցությունը ողջունեցին նաև Հայաստանի և Հունաստանի արտգործնախարարները», — ասաց Գոիկը։
ՀՀ սփյուռքի նախարարի և Կիպրոսի Հանրապետության նախագահի արտերկրյա և հումանիտար հարցերով հանձնակատար Ֆոտիու Ֆոտիսի ու Հունաստանի փոխարտգործնախարար Տերես-Նիկոլայ Կուիկի գլխավորած պատվիրակությունների եռակողմ հանդիպումը կայացավ Սփյուռքի նախարարությունում։
