ԵՐԵՎԱՆ, 11 հոկտեմբերի–Sputnik. Եկեք Հայաստան ու ներդրումներ արեք. այդ կոչով է սփյուռքահայ գործարար, «Մենեջմենթ Միքս» ընկերության նախագահ Րաֆֆի Սեմերջյանն արտասահմանցի ներդրողներին կանչում Հայաստան։ Աշխատելով արաբական ու եվրոպական երկրներում` Սեմերջյանն իր փորձով է ասում. Հայաստանն ամենաապահով ու գրավիչ երկրներից է։
«Երբ մի արտասահմանցու հայտնեցի Հայաստանում հողի գները, նա շոկի մեջ ընկավ արժեքի մատչելի լինելուց։ Քիչ առաջ զանգահարեց ինձ ու պատասխանեց, որ գնելու է այդ հողերը։ Բացի այդ, կարևոր է աշխատավարձերի գործոնը։ Այսօր, եթե մեր աշխատավարձերը համեմատենք Գերմանիայի հետ, ապա դրանք 10–15 անգամ ավելի ցածր կլինեն։ Հայաստանի աշխատուժը նման չէ, ասենք, Բանգլադեշի աշխատուժին. այստեղ մեծ մասը կրթված է»,– ասաց Սեմերջյանը։
Ներդրումների արդյունավետության տեսանկյունից շահավետ է նաև այն հանգամանքը, որ Հայաստանը զարգացող երկիր է։ Նման պետություններում ավելի պարարտ հող կա արմատներ ձգելու և հաջողության հասնելու համար։
«Այսօր հարկային օրենքներից բողոքողներ կան։ Եթե դրանք համեմատես Սիրայի հետ՝ այո, այնտեղ ավելի մատչելի են հարկերը, սակայն դուք էլ գիտեք, թե այնտեղ ինչ ռիսկային է բիզնես դնելը։ Նույնը կարող ենք ասել Լիբանանի մասին. այն անկայուն երկիր է, ամեն ամիս մի խնդիր կա։ Շվեդիայում Հայաստանից 3 անգամ ավելի են հարկերը, Ֆրանսիայում` 2,5 անգամ։ Եթե այստեղ շահույթի վրա հարկը 20 տոկոս է, ապա Ֆրանսիայում 40 տոկոս է, Նորվեգիայում` մինչև 60 տոկոս, եթե մարդը ամուսնացած չէ»,– պատմեց Սեմերջյանը։
Հայաստանի առավելություններից են նաև ծախսերը։ Օրինակ, նրա խոսքով, մեր երկրում անհամեմատ մատչելի են տրանսպորտի ու լույսի ծախսերը։
Sputnik Արմենիայի այն հարցին, թե արդյո՞ք Սեմերջյանը Հայաստանում նկատում է ներդրումային աշխուժություն, նա դրական պատասխան տվեց։
«Հայաստանում կառուցվում է 20 նոր հյուրանոց։ Ինչպե՞ս, արդյո՞ք ներդրում անող բիզնեսմեններն այդչափ հիմար են։ Ուրեմն Հայաստանն իրենց գրավում է, ձգում»,–ասաց նա։
Րաֆֆի Սեմերջյանը համաձայնեց ՀՀ վարչապետ Կարեն Կարապետյանի` ավելի վաղ հայտնած կարծիքի հետ, որ հաճախ Հայաստանում ներդրումներ անելուց հետո դժգոհում են այն գործարարները, որոնք չեն կարողացել ժամանակին և ճիշտ հաշվարկել ռիսկերը։
Ինչ վերաբերում է սփյուռքահայ ներդրողներին, ապա մեր զրուցակիցն այն կարծիքի է, որ բիզնես անելուց առաջ պետք է մի կողմ դնել զգացմունքայնությունը։ Պետք է մտածել`ոչ թե հայրենիքին ես «լավություն անում», այլ գտել ես բարենպաստ միջավայր գործունեություն անելու համար։
Տեղեկացնենք, որ 2017-ի համար կառավարությունը կանխատեսել է 834 մլն դոլարի ներդրումային ծրագրեր։ Ընթացիկ տարվա 8 ամիսների տվյալով` ներդրումային ծրագրերի կատարողականը կազմել է շուրջ 376 միլիոն դոլար։
