«Բորնմուտի» հետ խաղում «Մանչեսթեր Յունայթեդի» գլխավոր մարզիչ ժոզե Մոուրինյոն արդեն հինգերորդ խաղն անընդմեջ իր թիմին հայտացուցակում տեղ չի գտնում Մխիթարյանի համար: Այսինքն` հայ ֆուտբոլիստի այլ ակումբ տեղափոխվելն արդեն ոչ թե հավանական է, այլ իրական:
Նոյեմբերի 25-ին «Բրայթոնի» հետ խաղում Հենրիխը դուրս եկավ փոխարինման հանդիպման 71-րդ րոպեին: Այդ խաղից հետո մանկունյանցիները ունեցել են շատ կարևոր ու սկզբունքային հանդիպումներ և «շարքային» խաղեր Անգլիական Պրեմիեր լիգայի և Չեմպիոնների լիգայի շրջանակներում: Բայց ոչ մի դեպքում պորտուգալացի մարզիչի հայ ֆուտբոլիստին նույնիսկ չի հայտավորել:
Յունայթեդում առաջին անգամը չէ, որ Մխիթարյանը հայտնվում է նման իրավիճակում: Նա խաղաժամանակ ստանում էր, իսկ «Օլդ Տրաֆորդը» նրա պատվին երգեր էր հյուսում: Բայց անցյալ մրցաշրջանում մանչեսթերյան դերբիից հետո Մխիթարյանը բավական երկար ժամանակ հայտվեց պահեստայինների նստարանին: Կար հույս, որ հայ ֆուտբոլիստը կվերադառնա խաղադաշտ, բայց այդպես չեղավ:
Ու ինչպես ցույց է տալիս ժամանակը, այս պահին լրիվ այլ իրավիճակ է ձևավորվել մեր հավաքականի առաջատարի շուրջ: Ամենայն հավանականությամբ Հենրիխը ձմեռային պատուհանի ժամանակ լքելու է մանչեսթերյան ակումբը: Այդպես մտածելու նախադրյալներ, համենայնդեպս, կան ու իրական են: Բացի նրանից, որ Մխիթարյանը չի հայտավորվել, հայ ֆուտբոլիստը «Բորնմուտի» խաղից առաջ հանդիպել է Մոուրինյոյի հետ: Ու քանի որ նա չի մասնակցել նաև Պրեմիեր լիգայի 17-րդ տուրի խաղին, կարելի է ենթադրել, որ Մոուրինյոն ու Մխիթարյանը արդեն վերջակետ են դրել իրենց մարզիչ-ֆուտբոլիստ հարաբերություններին:
Մոուրինյո-Մխիթարյան հարաբերությունների վատթարացման պատճառները մի քանիսը կարող են լինել: Տարբեր վարկածներ են շրջանառվում: Առաջիններից մեկը տարվա լավագույն մարզիչ ընտրությունն է Մխիթարյանի կողմից: Հայ ֆուտբոլիստը լավագույն եռակի իր քվեաթերթիկում նշել էր` Զինեդին Զիդան, Մասիմիլիանո Ալեգրի և Լեոնարդո Ժարդիմ հերթականությունը: Կարո՞ղ էր վիրավորվել Մոուրինյոն` այս ցուցակում իրեն չտեսնելով: Գործնականում կարող էր: Համենայնդեպս, հաստատել կամ հերքել հնարավոր չէ դա:
Անգլիական լրատվամիջոցները Մխիթարյանին այս պահի դրությամբ «ուղարկում» են «Ինտեր» կամ Դորտմունդի «Բորուսիա»: Չեմ բացառում, որ կարող են լինել այլ տարբերակներ, որոնցից մեկը «Լիվերպուլն» է: Եթե Ֆիլիպե Կոուտինյոն տեղափոխվի «Բարսելոնա», ապա Մխիթարյանը շատ լավ կարող է հանդես գալ իր նախկին մարզիչ Յուրգեն Կլոպի ղեկավարությամբ: Բայց բոլորն էլ վարկածներ են, և Մխիթարյանի տեղափոխությամբ առաջին հերթին զբաղվելու է նրա գործակալը: Մեզ համար առավել քան կարևոր է Հենրիխի խաղադաշտ դուրս գալն ու խաղաժամանակ ստանալը: Թե ո՞ր թիմում դա կլինի, կիմանանք շատ շուտով: Պարզ է մեկ բան` Հենրիխ Մխիթարյանը Անգլիայում արժանի էր ավելիին, և դա հայ ֆուտբոլիստը միանշանակ կարող է ապացուցել այն ժամանակ, երբ դուրս կգա խաղադաշտ:
