ԵՐԵՎԱՆ, 13 դեկտեմբերի — Sputnik. «Պոբեդա» ռուսական լոուքոսթերը սահմանափակել է ինքնաթիռ վերցվող ուղեբեռի սահմանաչափը` նշելով, որ ինքնաթիռներն ամբողջությամբ ծանրաբեռնված են։
«Պոբեդան» կրկին փոխել է ձեռքի ուղեբեռի և ուղեբեռի փոխադրման կանոններն` արգելելով ուղևորներին իրենց հետ ինքնաթիռ տանել իրեր, որոնք իրենց չափերով գերազանցում են 36x30x27 սմ անվճար ուղեբեռի համար ավիաընկերության կողմից սահմանված նորմը։
Ավելի վաղ լոուքոսթերի ուղևորներին թույլ էին տալիս լրացուցիչ վճարելու դեպքում իրենց հետ օդանավ վերցնել նորմը գերազանցող չափաբաժին, դրանք որպես ուղեբեռ հանձնելու փոխարեն։
Ավիաընկերության կանոնների փոփոխությունը բացատրել են օդանավի սրահում լրացուցիչ բեռի համար նախատեսված տեղի բացակայությամբ։
Ինչպես պարզաբանել են ավիաընկերության ներկայացուցիչները, հաճախորդների 70%–ը լրացուցիչ բեռի համար գումար չի վճարում, այլ սահմանափակվում են ձեռքի ուղեբեռի անվճար չափով, երկրորդը, վճարովի ուղեբեռի համար օդանավում տեղ չկա։ Նշվում է, որ չվերթերի ճնշող մեծամասնությունն իրականացվում է ամբողջական ծանրաբեռնվածությամբ, առավել ևս այսօր, երբ մարդիկ տաք են հագնվում։
«Պոբեդայի» թարմացված կանոնների համաձայն` ինքնաթիռի սրահում ուղևորները կարող են տեղափոխել միայն անվճար ձեռքի ուղեբեռ և այնպիսի իրեր, որոնց տեղափոխումը թույլատրված է Դաշնային ավիացիոն կանոններով (ԴԱԿ կ. 135)` ծաղկեփունջ, կոստյում` ճանապարհորդական պայուսակում, կանացի պայուսակ և այլն։ Այս իրերն իրենց քանակով և քաշով չեն սահմանափակվում, սակայն նրանց առավելագույն չափերը չեն կարող գերազանցել 36х30х27 սմ–ն։
Մանկական օրորոցներն ու սայլակները, ձեռնափայտերը, ծալովի բազկաթոռ–մանկասայլակները ավիաընկերությունն անվճար է տեղափոխում օդանավի սրահում և ապահովում է դրանց տեղավորումը բեռի համար նախատեսված հատուկ հատկացրած դարակի վրա։
2016 թվականի դեկտեմբերից «Պոբեդան» Մոսկվա է թռնում Հայաստանի մեծությամբ երկրորդ քաղաք` Գյումրիից։
