ԵՐԵՎԱՆ, 15 դեկտեմբերի – Sputnik, Արմենուհի Մխոյան. Այնպես, ինչպես կարգն է՝ չար աչքից ու փորձանքից հեռու, «Պոբեդայի» ինքնաթիռն օրհնվեց ու դեկտեմբերի 15-ին օդ բարձրացավ: Չնայած Աստծու օրհնությամբ օդ բարձրանալու ցանկություններին, ինքնաթիռի 189 ուղևորից 16-ն առաջինը Մոսկվա մեկնելու հնարավորություն չունեցան. 10-ը Գյումրի-Վանաձոր ճանապարհի փակ լինելու պատճառով էին ուշացել, և նրանց թույլ չտվեցին թռիչքին մասնակցել, 6-ն էլ ընդհանրապես չէին հասել օդանավակայան: Մյուսներն էլ «էժանով» թեյախմության մեկնեցին Մոսկվա:
Գյումրու օդանավակայանի` ավելի քան 8 ամիս տևած դադարից հետո, ինչպես գյումրեցիներն են ասում, «Գյումրու թևերը հետ տվեցին»:
Մարզում ավելի շատ ուրախացել են խոպանչիները. գրպանի համար կրկնակի լավ է` և՛ տոմսի արժեքն է մատչելի, և՛ Երևան հասնելու կարիք չկա: Չնայած դրան, դժգոհողներ էլ կան. նրանց մտահոգում է ուղեբեռի արժեքը:
«Պոբեդա» ավիաընկերության տնօրեն Անդրեյ Կալմիկովը տեղեկացրեց՝ Գյումրու օդանավակայանում պայմանները շատ լավն են նման թռիչք իրականացնելու համար, իսկ «Պոբեդան» մատչելի է, հարմար ու ամենակարևորը` անվտանգ:
Ընկերության հայաստանյան ներկայացուցիչը նշեց՝ էժան տոմսերի արժեքը սահմանվում է շուկայի պահանջից ելնելով, այնպես որ ուղևորները պետք է արագ գործեն և օնլայն տարբերակով արագ պատվիրեն:
««Զվարթնոցի» բացասական պատասխանից հետո Հայաստանի ավիաիշխանությունները մեզ այլընտրանքային տարբերակ առաջարկեցին` Գյումրու օդանավակայանը: Մենք բանակցեցինք և փոխշահավետ պայմաններ ձեռք բերեցինք: ՀՀ տրանսպորտի և կապի նախարարությունը Գյումրի մեկնող ուղևորների համար չեղարկեց, այսպես կոչված, օդի հարկը։ Դրանից բացի, օդանավակայանում սպասարկման վարձը մեզ համար ավելի մատչելի է»,- մանրամասնեց Անդրեյ Կալմիկովը:
«Պոբեդայի» տնօրենը Գյումրու օդանավակայանը որակեց լոուքոսթերներ սպասարկող օդակայան, ինչը հույս է ներշնչում, որ բացի ռուսական այս ավիաընկերությունից, այլ ընկերություններ ևս կմտնեն հայկական շուկա` մատչելի գներով ու ուղղություններով: Բոլոր նրանք, ովքեր ցանկանում են հայտարարված 7300 դրամով մեկնել Մոսկվա, պետք է արագ գործեն ցանկացած թռիչքի համար. տոմսերը շատ արագ են սպառվում (դեկտեմբերի և հունվարի թռիչքների տոմսերն արդեն սպառված են):
Ընկերության հայաստանյան ներկայացուցիչ Հարություն Հայրապետյանի խոսքով` ինչպես էժան, այնպես էլ թանկ տոմսերի արժեքը որոշվում է ըստ շուկայի պահանջարկը:
«Ընկերության վարած քաղաքականության համաձայն` ցանկացած չվերթի համար կլինեն մինիմալ արժեքով որոշակի քանակի տոմսեր»,-նշեց պատասխանատուն՝ հավելելով, որ ընկերությունը լրացուցիչ գումարներ է վաստակում բեռների հաշվին. ցածր բյուջետային ավիաընկերությունները, այդ թվում` նաև «Պոբեդան», այդ քաղաքականությունն են վարում:
Պատասխանատուները նշեցին, որ ավիաընկերությունն արդեն 10 հազար տոմս է վաճառվել դեկտեմբեր և հունվար ամիսների համար:
Դեկտեմբերի 15-ին մեկնարկած Երևան-Մոսկվա չվերթերը կիրականացվեն ցերեկային ժամերին, շաբաթական 3 անգամ` երեքշաբթի, հինգշաբթի և կիրակի օրերին: Ինչպես և հայտարարվել էր, տոմսերի արժեքը լինելու է սկսած 999 ռուբլուն համարժեք ՀՀ դրամից:
