Հստակեցվել են հայաստանցի արտահանողներին ԱԱՀ–ի վերադարձման նոր ժամկետները

ԵՐԵՎԱՆ, 13 դեկտեմբերի — Sputnik. Հայաստանցի արտահանողների համար կրճատել են ԱԱՀ վերադարձնելու ժամկետը. հիմա այդ ժամկետը երեք ամսվա փոխարեն մեկ ամիս կլինի։ Հարկային օրենսգրքի համապատասխան փոփոխությունների նախագիծը հաստատվեց այսօր երկրորդ ու վերջնական ընթերցման ժամանակ ՀՀ ԱԺ արտահերթ նիստում։

Եթե ձեռնարկությունը Հայաստանից ապրանքն է արտահանում, մաքսայինը ապրանքի արժեքին ԱԱՀ է ավելացնում ու վերցնում է այն։ Սակայն պետությունը պարտավորվում է վերադարձնել այն 90 օրվա ընթացքում, ուշացնելու դեպքում պետությունը բիզնեսին տուգանք պետք է վճարի։

Հիմա վերցրած ԱԱՀ–ն ավելի արագ կվերադարձնեն` 30 օրվա ընթացքում։

2017 թվականին արտահանողների ԱԱՀ վերադարձնելու համար ՀՀ պետական բյուջեից 17 միլիոն դրամ է տրամադրվել։ 2018 թվականից այդ գումարներն այլևս առանձին հոդվածով չեն նշվի (Արժույթի միջազգային հիմնադրամի վիճակագրական մեթոդոլոգիայի համաձայն)։