ԵՐԵՎԱՆ, 12 դեկտեմբերի — Sputnik. ԱԺ ՀՀԿ-ական պատգամավոր Խոսրով Հարությունյանը չի պատրաստվում ներողություն խնդրել իր արտահայտության համար, թե մսի թանկացումը չի ազդի աղքատ մարդկանց վրա, որոնք միևնույն է`միս գնելու փող չունեն և շարունակելու են կարտոֆիլ ուտել: Այսօր` դեկտեմբերի 12-ին, նա ԱԺ-ում պատասխանել է իր հրաժարականի պահանջի մասին հարցին` նշելով, որ ընդամենը մեկնաբանել է մեկ այլ պատգամավորի` Հակոբ Հակոբյանի հայտարարությունը:
Լրագրողները հարցրել են նրան` ինչո՞ւ կարտոֆիլ չի ուտում, ինչպես խորհուրդ էր տվել աղքատներին։
«Իմիջիայլոց, ուտելուց լավ էլ ուտում եմ»,- պատասխանել է պատգամավորը։
Հաջորդ հացը վերաբերել է մսին. «Իսկ ի՞նչ միս եք նախընտրում»
«Դե արդեն զավեշտի եք վերածում»,- ասել է Հարությունյանը:
Նշենք, որ դեկտեմբերի 8-ին ԱԺ «Հանրապետական» խմբակցության պատգամավոր, առողջապահության և սոցիալական հարցերի մշտական հանձնաժողովի նախագահ Հակոբ Հակոբյանը լրագրողների հետ զրույցում, պատասխանելով թանկացող սննդամթերքի մասին հարցերին, հայտարարել էր, որ աղքատներին թանկացումը չի վնասում, քանի որ նրանք գումար չունեն և առևտուր չեն անում։ Հետևաբար նրանց համար միևնույն է` կարագն ու միսն էժան են, թե թանկ։
Կարտոֆիլի մասին խորհուրդ տվող պատգամավորի ու նրա զավակների ունեցվածքը
Խոսրով Հարությունյանն էլ իր հերթին նշել էր, որ գործընկերը չի ցանկացել վիրավորել մարդկանց, պարզապես նկատի է ունեցել, որ եթե մարդը սովոր է կարտոֆիլ ուտել, միևնույն է, մսի թանկացումը նրա վրա չի ազդի, քանի որ միս գնելու գումար չունի և շարունակելու է կարտոֆիլ օգտագործել։
