ԵՐԵՎԱՆ, 12 դեկտեմբերի — Sputnik. 2020 թվականից Հայաստանում ուզում են հրաժարվել գույքի ու հողի հարկերի զիջումներից։ Այդ մասին Sputnik Արմենիայի թղթակցին հայտնեց հանրապետության ֆինանսների նախարարի տեղակալ Դավիթ Անանյանը։
Բանն այն է, որ գույքահարկը հաշվարկվում է` ելնելով տան կադաստրային գնից, որը մի քանի անգամ ցածր է շուկայականից։
Համեմատության համար նշենք, որ Երևանի կենտրոնում բնակարանի մեկ քառակուսի մետրի արժեքը գնահատվում է առնվազն 120 հազար դրամ։ Սրան գումարվում են ուղղիչ գործակիցները (դրանք հիմնականում նվազեցնող են)` մաշվածություն, հարկ, տանիքի տեսակ։
Ըստ պաշտոնական վիճակագրության` Երևանի կենտրոնի բնակարաները գրեթե չորս անգամ թանկ են։ Նշանակում է, որ այդ բնակարանների համար չորս անգամ քիչ հարկ են վճարում, քան կարող էին, կարծում են ֆինանսների նախարարությունում։
Միաժամանակ, չեն ուզում հարկով գերբեռնել ոչ շատ հարուստ ընտանիքներին (այդպիսի ընտանիքներ ապրում են նաև կենտրոնում, իսկ մնացած շրջանների մասին նույնիսկ խոսք չի կարող լինել)։
Այդ պատճառով «շուկայի սառը ձեռքը» սկզբում կհասնի ամենաթանկ տներին ու հողին, որոնք 100 միլիոն դրամից բարձր գին ունեն։ Դրանց համար ֆինանսների նախարարությունն ու Կադաստրի պետական կոմիտեն կավելացնի ուղղիչ գործակիցները։ Բարեփոխման առաջին շրջանն ուզում են ավարտել մինչ 2018 թվականի ավարտը։ Իսկ հետո արդեն կքննարկվի` արժե՞ արդյոք տարածել օրենքը բոլորի վրա։
