ԵՐԵՎԱՆ, 12 դեկտեմբերի — Sputnik. Հայաստանի բանկերին կարգելեն կամայական տույժեր նշանակել վարկերի մարումն ուշացնելու համար։ Այդ առաջարկն ընդգրկված է հանրապետության Քաղաքացիական օրենսգրքում փոփոխությունների նախագծում։
Ինչպես խորհրդարանում հայտարարեց արդարադատության նախարարի առաջին տեղակալ Արթուր Հովհաննիսյանը, տույժերը չպետք է գերազանցեն պարտքի չափը։ Այլ կերպ ասած, եթե քաղաքացին (կամ ձեռնարկությունը) պարտք է բանկին 300 հազար դրամ, ապա նրա ընդհանուր պարտքը (տույժերի հետ միասին) չպետք է գերազանցի 600 հազար դրամը։
Բացի այդ, կարգելեն տույժերի «ընդհատակյա» գանձումը։ Մի շարք դեպքերում բանկերը սպասում են մի քանի ամիս կամ նույնիսկ տարի, նախքան պարտքը գանձելու մասին հայտարարելը։ Այդ ամիսների ընթացքում թաքուն տույժեր են «նկարում»։
Որպեսզի նման բան տեղի չունենա, հավելումների ժամկետը կսահմանափակվի երեք ամսով` վճարման ժամկետն ուշացնելու պահից մինչև պարտքը գանձելը։ Ժամկետը գերազանցող տույժերը հաշվի չեն առնվի։
