ԵՐԵՎԱՆ, 11 դեկտեմբերի — Sputnik. Ամանորի շեմին վրացական հեռուստատեսությունը հերթական նվերն է մատուցել հայաբնակ Ջավախքին։ Մեկնարկել է «ՏՕԿ ՏՎ» նոր ու Վրաստանում միակ ռուսալեզու ալիքը, փոխանցում է Mtisambebi.ge պարբերականը։
«Ջավախքի բնակիչների մեծ մասը հայեր են, 80%-ը վրացերենին չի տիրապետում։ «ՏՕԿ ՏՎ»-ն նրանց համար տեղեկատվության այլընտրանքային աղբյուր կլինի` հասանելի լեզվով», — նշված է հրապարակման մեջ։
Այդ տարածաշրջանում ազգային հեռարձակողների հետ կապված մեծ խնդիրներ կան. բարձրադիր գյուղերում հիմնականում անհասանելի են։ Հետևաբար, բնակչությունը ռուսական ու հայկական ալիքներ է դիտում։
Վրաստանի հանրային հեռարձակողի ներկայացրած տվյալների համաձայն` Ջավախքում ռուսական ալիքներ է դիտում բնակչության 40%-ից ոչ ավելին (խոսքը հիմնականում Ռուսաստանի «Առաջին ալիքի» ու ՆՏՎ-ի մասին է)։ Բարձր է հայկական հեռուստաալիքների ցուցանիշը։ Վրացական հեռուստաալիքները դիտում է բնակչության միայն 10%։
Սակայն Նինոծմինդայի համայնքային ռադիոյի ղեկավար Արարատ Տիյանի տվյալների համաձայն` եթե Ջավախքում հայկական ալիքներ է դիտում բնակչության 80%-ը, ապա ռուսականներ դիտողներինը հասնում է 60%-ի։
«Խնդիրն այն է, որ այդ տարածաշրջանի բնակչությունը Վրաստանում տեղի ունեցած իրադարձությունների մասին իմանում է ռուսական ու հայկական հեռուստաալիքներից», — փոխանցում է Mtisambebi-ն։
Ավելի վաղ Վրաստանի հանրային հեռուստատեսության առաջին ալիքի նորությունների թողարկման համաժամանակյա թարգմանություն էր ապահովվել Սամցխե-Ջավախքի հայերի ու ադրբեջանցիների համար։ Նոյեմբերի 5-ից վրացական հանրային հեռուստատեսության Առաջին ալիքի կայքը հասանելի է յոթ լեզվով, որոնց թվում է նաև հայերենը։ Այս փոփոխությունները նպատակն է բոլոր ազգերի ներկայացուցիչներին ներգրավել տեղեկատվական հոսքի մեջ։
Հանրային հեռարձակողը դրանով չի սահմանափակվում։ Հնարավոր է` Առաջին ալիքի կայքում Վրաստանում հայկական համայնքի գործունեության մասին բաժին բացվի։
Մարդահամարի տվյալների համաձայն` Ջավախքում 160504 մարդ է ապրում, որից 81 089-ը հայ են, իսկ 57 610-ը չեն տիրապետում վրացերենին։