ԵՐԵՎԱՆ, 11 դեկտեմբերի— Sputnik, Լաուրա Սարգսյան. Հայկական թաղամասը և այնտեղ բնակվող հայերը չեն տուժել բախումների հետևանքով։ Այսօր Երուսաղեմում հանգիստ և խաղաղ է, սակայն այն, ինչ տեղի է ունեցել, կարող է բացասաբար անդրադառնալ նրանց բարեկեցության վրա, Sputnik Արմենիայի թղթակցի հետ զրույցում ասաց Երուսաղեմի հայ պատրիարքարանի վարդապետ Կորյուն Բաղդասարյանը։
Թրամփի կողմից Երուսաղեմն Իսրայելի մայրաքաղաք ճանաչելն իրարանցում է առաջացրել համաշխարհային հանրության մեջ։ Ամերիկայի առաջնորդը նաև փաստաթուղթ է ստորագրել ամերիկյան դեսպանատունը Թել Ավիվից Երուսաղեմ տեղափոխելու մասին։
«Երուսաղեմում և հայկական թաղամասում ամեն ինչ հանգիստ է, խաղաղ։ Թրամփի հայտարարությունից հետո սկսած բախումները շրջանցել են հայկական թաղամասը։ Այդ առումով հայ համայնքն անվտանգության մեջ է», – ասաց Բաղդասարյանը։
Նրա խոսքով` բախումները հիմնականում տեղի են ունեցել Պաղեստինում, Բեթղեհեմում, Արևելյան Երուսաղեմում, Դամասկոսի դարպասների մոտ։ Սակայն եթե ընդհարումները շարունակվեն, ապա դա կհարվածի տեղի հայերի գրպանին։
«Սուրբ ծննդի տոնին մենք սպասում էինք բազմաթիվ հայ ուխտագնացների, այս տարի տոնը, ամենայն հավանականությամբ, կնշենք առանց նրանց։ Եթե բախումները շարունակվեն, հայ ուխտագնացները, անվտանգության նկատառումներից ելնելով, չեն գա», – ասաց Բաղդասարյանը։
Դա, ընդհանուր առմամբ կազդի նաև զբոսաշրջիկների հոսքի վրա, ինչն իր հերթին կվնասի տնտեսությանը։ Տեղի հայերը հիմնականում զբաղվում են առևտրով և հյուրանոցային բիզնեսով, զբոսաշրջիկների թվի նվազումն առաջին հերթին կազդի նրանց վրա, կարծում է Բաղդասարյանը։
Երուսաղեմի հայ պատրիարքությունը հույս ունի, որ իրավիճակը շուտով կփոխվի, և բախումները, որոնք համայնքի համար հղի են բացասական հետևանքներով, չեն կրկնվի։
ՀԱԵ Երուսաղեմի պատրիարք, արքեպիսկոպոս Նուրհան Մանուկյանը 13 պատրիարքների և Երուսաղեմի եկեղեցիների ղեկավարների հետ միասին նախազգուշացրել է ԱՄՆ նախագահ Դոնալդ Թրամփին, որ քաղաքի կարգավիճակի փոփոխությունը կհանգեցնի անդառնալի հետևանքների։
«Մենք համոզված ենք, որ նման քայլը կհանգեցնի ատելության, հակամարտության և տառապանքների Երուսաղեմում և Սուրբ հողում», – գրել են հոգևորականները։
Իսրայելում բնակվում է աշխարհի ամենաակտիվ հայ համայնքներից մեկը։ Երուսաղեմի հին հատվածը հայ քրիստոնյաները կիսում են հրեաների, մահմեդականների և այլ քրիստոնյաների հետ։ Նրանց համար գոյություն ունի երկու հայրենիք` պատմական և հոգևոր` Երուսաղեմը։ Հայերը և հայկական հետքը Հին քաղաքին հաղորդում են այն կոլորիտը, որը հարյուրավոր հավատացյալներ է ձգում ամբողջ աշխարհից։
