ԵՐԵՎԱՆ, 11 դեկտեմբերի — Sputnik. Թուրքիայի նախագահ Ռեջեփ Թայիփ Էրդողանը, ով հերքում է Հայոց ցեղասպանության ժամանակ երեխաների սպանության փաստը, չպետք է խոսի բարոյականության մասին, Twitter–ում գրել է «Եշ Աթիդ» իսրայելական ընդդիմադիր կուսակցության նախագահ Յաիր Լապիդը։
Ավելի վաղ Էրդողանը սպառնացել էր խզել Իսրայելի հետ դիվանագիտական կապերը, եթե ԱՄՆ–ն Երուսաղեմը ճանաչի Իսրայելի մայրաքաղաք։ Բացի այդ, նա Երուսաղեմն անվանել էր` «բանտ մուսուլմանների համար»։
«Էրդողանը Իսրայելն անվանել էր «ահաբեկիչների պետություն»։ Նրանք, ովքեր հերքում են Հայոց ցեղասպանության ժամանակ երեխաների սպանությունը, չպետք է մեզ բարոյականություն քարոզեն», – գրել է Լապիդը։
Լապիդն ավելի վաղ կոչ էր արել ճանաչել Հայոց ցեղասպանությունը։
Փարիզում էլ, Ֆրանսիայի նախագահի հետ մամուլի ասուլիսի ժամանակ Իսրայելի վարչապետ Բենիամին Նեթանյահուն հայտարարել էր, որ «Էրդողանը չէ, որ պետք է ինձ քարոզ կարդա»։
Նրա խոսքով` մարդը, ով ռմբակոծել է քրդական գյուղերը, լրագրողներին բանտ նետել, օգնել Իրանին խուսափել միջազգային պատժամիջոցներից, աջակցել ահաբեկիչներին Գազայում և այլ վայրերում անմեղ մարդկանց սպանել, թող քարոզ չկարդա։
ארדואן קרא לישראל ״מדינה טרוריסטית. רוצחת ילדים״. מי שמכחיש את רצח הילדים בשואה הארמנית שלא יטיף לנו מוסר.
— יאיר לפיד (@yairlapid) 10 декабря 2017 г.
