ԵՐԵՎԱՆ, 11 դեկտեմբերի — Sputnik. Իսրայելի իշխանությունները Երուսաղեմը մուսուլմանների համար բանտի են վերածել, ասել է Թուրքիայի նախագահ Ռեջեփ Թայիփ Էրդողանը, հայտնում է Anadolu գործակալությունը։
«Նրանք, ովքեր իրենց այսօր Երուսաղեմի տերերն են համարում, պետք է իմանան, որ վաղն իրենք չեն կարողանա նույնիսկ ծառ գտնել, որի հետևում կկարողանան թաքնվել», – զգուշացրել է պետության ղեկավարը։
Թուրք առաջնորդի խոսքով` նրանք, ովքեր Երուսաղեմը «բաց երկնքի տակ» բանտի են վերածվել մուսուլմանների և այլ կրոնների ներկայացուցիչների համար, երբեք չեն կարողանա արյունը մաքրել իրենց ձեռքերից։
Ավելի վաղ Փարիզում` Ֆրանսիայի նախագահի հետ տեղի ունեցած մամուլի ասուլիսի ժամանակ Իսրայելի վարչապետ Բենիամին Նեթանյահուն հայտարարել էր. «Էրդողանը չէ, որ պետք է գլխիս քարոզ կարդա»։
Նրա խոսքով` այն մարդը, ով քրդական գյուղեր էր ռմբակոծում, լրագրողներին բանտ նետում, օգնում Իրանին զերծ մնալ միջազգային պատժամիջոցներից, աջակցում ահաբեկիչներին Գազայում և այլուր անմեղ մարդկանց սպանելու մեջ, թող հեռու մնա։
