ԵՐԵՎԱՆ, 11 դեկտեմբերի — Sputnik, Արամ Գարեգինյան. Հայաստանում ռեստորանների և զբոսաշրջային բյուրոների համար հարկերը կթեթևացնեն։ Հարկային օրենսգրքում նման փոփոխություններ կատարելու օրինագիծը կքննարկվի ԱԺ–ում, դեկտեմբերի 12-ի արտահերթ նիստի ընթացքում։
ԱԱՀ չի գանձվի օտարերկրյա քաղաքացիներին վաճառվող զբոսաշրջային փաթեթներից։ Ներքին և արտասահմանյան ուղեգրերի համար ԱԱՀ–ն կպահպանվի։
Նման «դյուրամարս» ռեժիմ առաջարկեցին նաև ռեստորանների համար։ Այժմ նրանք ֆիքսված գումարներ են վճարում (քմ–ի հաշվարկով), իսկ խոշոր համալիրները (600 քմ–ից ավել)` եկամտահարկ և ԱԱՀ։ 2018 թվականից ուզում էին գումարեին նաև 100 քմ ավել տարածք ունեցող ռեստորանները։ Այդպես էլ անելու են։ Սակայն ոչ թե հունվարից, այլ հուլիսից։ Երկրորդ` դրանցից ԱԱՀ չեն գանձելու։ 100 քմ–ից ավել տարածք զբաղեցնող ռեստորանները հասարակ հարկ են վճարելու շրջանառությունից։ Նույնիսկ բրոնզե աշտարակներով, սյուներով և կիսաաստվածներով երեք հարկանի «ստամոքսի պալատները»։
Ճիշտ է` նրանց համար շրջանառության հարկը մի փոքր ավել կլինի` 10% (առևտրականների 5% փոխարեն)։ Իսկ հաշիվ ապրանքագրերի առկայության դեպքում հարկը հնարավոր կլինի կրճատել մինչև 6%։
Սակայն հենց փաստաթղթերի հարցում մի շարք ռեստորաններ խնդիրներ ունեն։ Չէ՞ որ միս, կարտոֆիլ կամ սմբուկ նրանք գյուղացուց են գնում։ Իսկ այդ դեպքում հաշիվ ապրանքագիր գրելը դժվար է` ոչ ոք չի համաձայնում։ Սակայն փաստաթղթի անհրաժեշտ ձև կառաջարկեն նաև այս դեպքում։
Նշենք, որ Հայաստանում 2017 թվականի հունվար–սեպտեմբեր ամիսներին 1 մլն 172 հազար զբոսաշրջիկ է ժամանել, 2016 թվականի նույն ժամանակահատվածի 969 հազարի համեմատ (միջազգային կանոնների համաձայն` զբոսաշրջիկ են համարվում երկիր ժամանակավոր ժամանած բոլոր այն անձինք, ովքեր վճարովի աշխատանքով չեն զբաղվում)։
Որպես կանոն, հյուրանոցներում նրանց միայն փոքր մասն է կայանում (հիմնականում հյուրընկալվում են բարեկամների մոտ)։ Սակայն դինամիկան փոխվում է նաև այս հարցում` 136,8 հազարի փոխարեն այս տարի հյուրանոցում համար է ամրագրել 201,7 հազար մարդ։
