ԵՐԵՎԱՆ, 29 նոյեմբերի — Sputnik. Հայաստանի մայրաքաղաքը բավականին հետաքրքիր և չբացահայտված ուղղություն է: Սակայն Երևանով ձեր կատարած շրջագայությունն առաջին հերթին կհիշվի շնորհիվ նրա բնակիչների հյուրընկալության և ջերմության, գրում է իսպանական Sur պարբերականի անգլալեզու տարբերակի լրագրող և ճանապարհորդ Էնդրյու Ֆորբսը:
«Հայաստանի մայրաքաղաքում բազում մշակութային հուշարձաններ կան, իսկ կենտրոնը հագեցած է հարմարավետ սրճարաններով և ռեստորաններով, որոնք հիանալի են արժանավայել հանգստի համար», — նշում է բլոգերը:
Հայաստանը նա համեմատում է միջերկրածովյան երկրների հետ:
«Թունդ սուրճի բույրը սավառնում է օդում: Ես լսում եմ, թե ինչպես է հարևան սեղանիկի շուրջ մատուցողը զգուշորեն բացում գինու շիշը, և ինչպես է այն հետո խշշոցով լցվում բաժակի մեջ: Տիպիկ միջերկրածովյան մթնոլորտ… Երևանը զարմանալի վայր է: Այս աստիճան անմիջական և բարեհաճ միջավայր ես չէի սպասում», — գրում է Ֆորբսը:
Նրա խոսքով` Հայաստանն ու իր հարևանները գնալով ավելի շատ են հետաքրքրասեր այցելուների գրավում, ովքեր ցանկանում են բացահայտել ժամանակին ԽՍՀՄ մաս կազմած տարածաշրջանի հետաքրքրաշարժ պատմությունը:
Բլոգերը հայկական խոհանոցն անվանում է անկրկնելի:
«Ուտելիքը թարմ է և գեղեցիկ ձևավորած: Հայերը հպարտանում են իրենց խոհանոցով և հաճախ առաջարկում են ազգային կերակուրներ համտեսել, օրինակ` տոլմա կամ «ժենգյալով հաց»: Նրանք առաջարկում են նաև տեղական գինի և գարեջուր փորձել կամ հայտնի «Արարատ» կոնյակը… Հայաստանում պատրաստ եղեք կենացների, ընդ որում սեղանի շուրջ ասվող կենացները մեկը մյուսից պոետիկ են` ընկերների, ուտելիքի, երկրի, ընտանիքի համար… Այս փաստը ևս մեկ անգամ ընդգծում է այստեղ տիրող ջերմությունն ու ընտանեկան հյուրընկալ մթնոլորտը», — ընդգծում է ճանապարհորդը:
Նրա խոսքով` զբոսաշրջիկներին հետաքրքիր կլինի այցելել հնագույն քրիստոնեական վանքերը:
«Ամենագեղեցիկներից մեկը IX դարի Տաթևի վանքն է: Այն իսկապես վառ տպավորություն է թողնում: Վանական համալիրը գտնվում է աննկարագրելի գեղեցիկ կիրճի ամենածայրին. այնտեղ կարելի է հասնել ճոպանուղով, որի սրահից հրաշալի տեսարան է բացվում դեպի կիրճը», — նշում է Ֆորբսը:
Իր ընթերցողներին նա նաև խորհուրդ է տալիս այցելել «Մատենադարան», Պատմության թանգարան և 1915 թվականի Հայոց ցեղասպանության զոհերին նվիրված հուշահամալիր` Ծիծեռնակաբերդ:
