ԵՐԵՎԱՆ, 10 դեկտեմբերի – Sputnik. «Եվրատեսիլ 2017» մրցույթի հաղթող, պորտուգալացի Սալվադոր Սոբրալը տարել է սրտի փոխպատվաստման վիրահատություն, հաղորդում է ՌԻԱ Նովոստին։ Հայտնի է, որ դոնորական սիրտը, որը ստացել է երգիչը, պատկանել է պատանի բրիտանուհուն։
Ավելի վաղ ԶԼՄ-ները գրել են, որ 13-ամյա մահամերձ աղջիկը դոնոր է դարձել 8 մարդու համար։ Նրա սիրտը, բարակ աղիքը, ենթաստամոքսային գեղձը և թոքերը փոխպատվաստել են չորս հիվանդի։ Լյարդը բաժանվել է մասերի, որոնք փոխպատվաստվել են երկու հիվանդի։ Աղջկա երիկամները փրկել են ևս երկու հոգու կյանք։
Հաղորդվում է, որ վիրահատությունը կատարել են դեռ դեկտեմբերի 8-ին, այն շարունակվել է չորսուկես ժամ։ Բժիշկները պատմել են, որ փոխպատվաստումը հաջող է անցել և այժմ երգիչը պետք է վերականգնման երկար փուլ անցնի։ Նա գտնվում է Լիսաբոնի Սանտա Կրուզ հիվանդանոցում։
Սոբրալը վերականգնողական բաժանմունքում հայտնվել էր սեպտեմբերի վերջին։ Հայտնի է, որ երգիչը երեք ամիս սպասել է դոնորական օրգանի։ Այդ ընթացքում նա միացած է եղել արհեստական սրտի։
«Վիրահատությունը հաջող է անցել։ Նա շատ պատրաստված էր դրան, այդ երիտասարդը հիանալի հասկանում էր գալիք վիրահատության բոլոր բարդությունները», — հաղորդել է պորտուգալական Publico հրատարակությանը վիրաբույժ Միգել Աբեկասիսը։
Հիշեցնենք, որ պորտուգալացի Սալվադոր Սոբրալը հաղթել էր «Եվրատեսիլ 2017» մրցույթում՝ կատարելով Amar pelos dois («Սեր երկուսի համար») երգը:
