ԵՐԵՎԱՆ, 9 դեկտեմբերի — Sputnik. Իրանի պաշտպանության նախարար Ամիր Հաթեմին Մոսկվա է մեկնում` Երուսաղեմի շուրջ ստեղծված իրավիճակը քննարկելու համար, կարծում է իրանագետ Կարեն Մկրտչյանը:
Ավելի վաղ հայտնել էին, որ Իրանի պաշտպանության նախարար Ամիր Հաթեմին ծրագրում է հանդիպել ռուս գործընկեր Սերգեյ Շոյգուին:
«Շատ հավանական է, որ կողմերը քննարկեն Երուսաղեմի շուրջ ստեղծված վերջին զարգացումները: Իրանի արտաքին քաղաքականության մեջ Իսրայելը բացառիկ դեր է կատարում` հաշվի առնելով, որ 1979 թվականից սկսած (Իսլամական հեղափոխություն)` հերքում է հրեական պետության գոյությունը», — ասաց Մկրտչյանը:
Իրանը, նրա խոսքով, ԱՄՆ-ի կողմից Երուսաղեմը Իսրայելի մայրաքաղաք ճանաչելու արդյունքում կարող է կտրուկ քայլերի գնալ: Այդ մասին են խոսում նաև ուրբաթօրյա աղոթքից հետո Իրանի քաղաքներում զանգվածային բողոքի ակցիաների կազմակերպումը:
Իրանագետը չի բացառում, որ Պաղեստինին ինչպես քաղաքական, այնպես էլ ռազմական աջակցություն կցուցաբերվի:
«Իրանն իսլամական դրոշի ներքո կարող է հանդես գալ որպես Պաղեստինի ժողովրդի հիմնական պաշտպան: Նա կարող է ցանկացած աջակցություն ցուցաբերել, այդ թվում` ռազմական, հատկապես, եթե իրավիճակը սկսի սրվել», — ասաց Մկրտչյանը:
Մյուս կողմից`պարտադիր չէ, որ իրավիճակը սրվի: Իրանագետը կարծում է, որ Ռուսաստանի հավանական միջամտությունը կարող է թուլացնել կրքերը, ինչը հավանական տարբերակներից մեկն է:
Հայերի համար, ըստ նրա, հաշվի առնելով Երուսաղեմում նրանց զգալի ներկայությունը, ամենակարևորն այն է, որ իրավիճակը հանգուցալուծում ստանա բանակցությունների ճանապարհով:
«Իսրայելում մենք պատմամշակութային մեծ ժառանգություն ունենք, հայկական կողմի համար կարևոր է որոշակի քայլեր ձեռնարկելը, մասնավորապես, հակամարտության խաղաղ կարգավորմանն աջակցելու համար», — ասաց Մկրտչյանը:
Տեսականորեն Հայաստանը կարող է առաջարկել իր միջնորդական ծառայությունները: Դրա համար, նրա կարծիքով, լուրջ հիմքեր կան, սակայն գործնականում հնարավորություններն այդքան էլ մեծ չեն:
«Կրոնական, խաղաղարար տեսանկյունից մենք կարող ենք միջնորդություն առաջարկել: Սակայն քաղաքական լուրջ մասնակցության համար Հայաստանն, իհարկե, հնարավորություններ չունի», — ասաց Մկրտչյանը:
Երուսաղեմը Իսրայելի մայրաքաղաք ճանաչելու ԱՄՆ նախագահի որոշումը զանգվածային բողոքի ցույցերի հանգեցրեց Պաղեստինում:
Պաղեստինի առողջապահության նախարարությունը հայտնել է, որ Հորդանան գետի արևմտյան ափին, Գազայի հատվածի և Երուսաղեմի տարբեր մասերում նախօրեին տեղի ունեցած բողոքի ակցիայի ժամանակ 1,1 հազար մարդ է տուժել:
