ԵՐԵՎԱՆ, 9 դեկտեմբերի — Sputnik. Պաղեստինի առողջապահության նախարարությունը հայտնել է, որ Հորդանան գետի արևմտյան ափին, Գազայի հատվածի և Երուսաղեմի տարբեր մասերում նախօրեին տեղի ունեցած բողոքի ակցիայի ժամանակ 1,1 հազար մարդ է տուժել: Ցուցարարները բողոքել են Երուսաղեմի կարգավիճակի վերաբերյալ որոշման դեմ: Այս մասին հայտնում է ՌԻԱ Նովոստին:
Պաղեստինցիները «ցասման օր» են կազմակերպել` բողոքելով ԱՄՆ նախագահ Դոնալդ Թրամփի` Երուսաղեմն Իսրայելի մայրաքաղաք ճանաչելու և ԱՄՆ դեսպանատունն այնտեղ տեղափոխելու որոշման դեմ: Բողոքի ակցիայի ընթացքում բախումներ են եղել ցուցարարների և իսրայելցի ուժայինների միջև:
Կարմիր կիսալուսինն ուրբաթ հայտնել է, որ տուժել է ոչ պակաս, քան 767 մարդ, որոնցից 60 հրազենային վնասվածքներ են ստացել։ Իսրայելի զինվորականները հաշվարկել են, որ Հորդանան գետի արևմտյան ափի ու Գազայի հատվածի տարբեր մասերում տեղի ունեցած անկարգություններին մոտավորապես 7,5 հազար մարդ է մասնակցել: Ցույցի մասնակիցները քարեր ու պայթուցիկ խառնուրդով շշեր են նետել և այրվող անվադողեր գլորել ուժայինների ուղղությամբ:
Զինվորներն էլ իրենց հերթին կրակ են բացել հիմնական հրահրողների ուղղությամբ:
