ԵՐԵՎԱՆ, 8 դեկտեմբերի — Sputnik. Եվրասիական զարգացման բանկը Հայաստանին տրամադրել է 100 մլն դոլար արժողությամբ երրորդ և վերջին տրանշը` բյուջետային բարեփոխումներին աջակցելու համար, հաղորդվում է բանկի պաշտոնական կայքում։ Տրանշին հավանություն է տվել Կայունացման և զարգացման եվրասիական հիմնադրամի խորհուրդը, այն կուղղորդվի 2015-2017թթ–ի Հայաստանի բյուջեի դեֆիցիտը ծածկելուն։
Գումարը փոխանցվել է Հայաստանի ֆինանսների նախարարությանը դեռ դեկտեմբերի 6–ին։
Երրորդ տրանշի հատկացումով Հայաստանի «բյուջետային» վարկի գումարը հասել է 300 միլիոն դոլարի։ Դրա փոխարեն Հայաստանը սկսել է ավելի խիստ հետևել բյուջեի ծախսերին։ 2017թ–ի 9 ամիսների ընթացքում բյուջեի դեֆիցիտը կրճատվել է ՀՆԱ 4.1 տոկոսից մինչև 2.5 տոկոս, տարվա արդյունքներում սպասվում է դրա կրճատում ՀՆԱ նախատեսված 5.5 տոկոսից մինչև 3.6 տոկոս։ Միաժամանակ կրճատումները վերաբերել են ոչ թե երկարաժամկետ ենթակառուցվածքային նախագծերին (ճանապարհներ, ոռոգման համակարգեր և այլն), այլ ընթացիկ ծախսերին։
Բացի այդ, 2018թ–ից հանրապետությունում ուժի մեջ կմտնի Կայունացման և զարգացման եվրասիական հիմնադրամի աջակցությամբ նորացված Հարկային օրենսգիրքը, որը 2017-2021թթ–ին կօգնի ավելի շատ հարկեր հավաքել (ՀՆԱ համապատասխան ակնկալվող աճը կկազմի երկու տոկոսային կետ)։ Բարեփոխվել է նաև պետական գնումների կարգը։
Բանկային կարգավորման ոլորտում Կենտրոնական բանկը վարում է արտասահմանյան արժույթով ավանդների և վարկերի կրճատման և ազգային արժույթով տրամադրման քաղաքականություն։ Դա բարձրացնում է բանկային համակարգի կայունությունը։
Եվրասիական զարգացման բանկից Հայաստանի վարկերի ընդհանուր պորտֆելը կազմում է 490 միլիոն դոլար։ 300 միլիոն դոլարից բացի, որոնք հատկացվել են բյուջետային բարեփոխումների աջակցությանը, Եվրասիական զարգացման բանկը Հայաստանին տրամադրել է 150 միլիոն դոլար` «Հյուսիս–հարավ» ավտոմայրուղու շինարարության ծրագրի շրջանակում, ինչպես նաև 40 միլիոն դոլար` ոռոգման համակարգերի արդիականացման ծրագրերի համար։
