ԵՐԵՎԱՆ, 6 դեկտեմբերի — Sputnik. Հայաստանի ու Ադրբեջանի արտգործնախարարները քննարկել են Արցախի կարգավորման երեք հիմնական սկզբունքը, որոնք ավելի վաղ հաստատել էին ինչպես Արևմուտքում, այնպես էլ Մոսկվայում, կարծում է քաղտեխնոլոգ Վիգեն Հակոբյանը։
Հայաստանի և Ադրբեջանի արտգործնախարարների հանդիպումը կայացել է դեկտեմբերի 6-ին Վիեննայում։
«Դժվար թե բանակցությունների օրակարգում որևէ նոր բան լինի։ Հավանաբար, որոշակի ճնշման ֆոնի ներքո ավելի առարկայական են եղել լարվածությունը թուլացնելու մեխանիզմների մասին քննարկումները, որոնց մասին հիշատակվել է Հայաստանի և Ադրբեջանի նախագահների` Շվեյցարիայում կայացած հանդիպման արդյունքում», — ասաց Հակոբյանը։
Արտգործնախարարները, նրա խոսքով, նոր պայմանավորվածություններ ձեռք բերել չեն կարող։ Քաղտեխնոլոգի խոսքով` նրանք «սև աշխատանք» են կատարում. այսինքն աշխատում են մի բանի վրա, ինչի մասին պայմանավորվում են նախագահները կամ առաջարկում են համանախագահները։
«Չեմ կարծում, թե որևէ լուրջ բան կա։ Ըստ ամենայնի, խոսքն ինչ-որ մանրամասների մասին է։ Հավանաբար, կողմերը քննարկում են նախագահների նոր հանդիպման հնարավորությունը։ Բանակցությունների սեղանին որևէ նոր բան չկա դրված և լինել չէր կարող», — ասաց Հակոբյանը։
Բանակցությունների ֆոնը, նրա խոսքով, ցույց է տալիս, որ Արևմուտքն ու Ռուսաստանը հակամարտող կողմերի հետ պայմանավորվել են, որ ներկա քննարկումները երեք սկզբունքին են վերաբերելու։
ՀԱՊԿ անդամ-պետությունների ղեկավարների` Արցախին վերաբերող վերջին հայտարարության մեջ նշվում է, որ հակամարտությունը կարող է կարգավորվել ուժի և ուժի սպառնալիքի չկիրառման, տարածքային ամբողջականության և ժողովուրդների ազատ ինքնորոշման իրավունքի սկզբունքներին վերաբերող միջազգային նորմերի և սկզբունքների, ՄԱԿ-ի կանոնակարգի, ինչպես նաև Հելսինկյան եզրափակիչ ակտի հիման վրա։
Հայաստանի ու Ադրբեջանի նախագահներ Սերժ Սարգսյանի և Իլհամ Ալիևի վերջին հանդիպումը կայացել է հոկտեմբերի 16-ին Ժնևում, ԵԱՀԿ Մինսկի խմբի համանախագահների նախաձեռնությամբ։ Համանախագահները հայտարարել են, որ Հայաստանի և Ադրբեջանի նախագահների հանդիպումն անցել է կառուցողական մթնոլորտում։
Ժնևում ԵԱՀԿ ՄԽ համանախագահները, Հայաստանի և Ադրբեջանի արտգործնախարարները վերջին տարիների ընթացքում առաջին անգամ համատեղ հայտարարություն ընդունեցին։ Նախագահները պայմանավորվեցին միջոցներ ձեռնարկել «լարվածությունն ավելի թուլացնելու համար»։ Հանդիպումից մի քանի օր անց առաջնագծում դիպուկահարի հարվածից Արցախի ՊԲ զինծառայող մահացավ։
